गेल्या वर्षी होती जगातील सर्वात मोठी कंपनी, आता 24 तासात बुडाले 5.25 लाख कोटी रुपये

आयफोन बनवणाऱ्या अॅपल कंपनीला आतापर्यंतचा सर्वात मोठा धक्का बसला आहे. कंपनीचं बाजारमूल्य काही तासातच 5.25 लाख कोटी रुपयांनी घसरलं. यामुळे कंपनीच्या शेअर्समध्ये गुंतवणूक करणाऱ्यांना मोठं नुकसान झालं आहे.

गेल्या 16 वर्षांमध्ये पहिल्यांदा अॅपलनं आपल्या अंदाजे उत्पन्नात घट केली. यामुळे कंपनीचे शेअर्स 10 टक्क्यांनी घसरले. गुरुवारी कंपनीचे शेअर्स 142.19 डॉलर इतकं खाली आले. शेअर्समध्ये 15.73 डॉलरची घसरण झाली.

गुरुवारी शेअर्सचे भाव 142 डॉलर्सवर स्थिरावलं. त्यानंतर कंपनीचे बाजारमुल्य 75 अरब डॉलर म्हणजेच 7500 कोटी डॉलर्सनी घटलं. भारतीय चलनानुसार कंपनीचे बाजारमुल्य 5.25 लाख कोटींनी घटलं.

अॅपलच्या शेअर्समध्ये गेल्या 2 महिन्यांपासून मोठी घसरण होत आहे. गेल्या वर्षी कंपनीचं बाजारमुल्य 1.1 लाख कोटी डॉलर्सवर म्हणजेच 77 लाख कोटी रुपयांवर पोहचलं होतं. तेव्हा शेअर्सचा भाव 233.47 डॉलर झाला होता.

अॅपलने एक दिवस अगोदर त्यांची कमाई 2018 च्या शेवटच्या तिमाही अंदाजापेक्षा कमी राहणार असं म्हटलं होतं. सुरुवातीला अॅपलनं 89 अब्ज डॉलरचा अंदाज वर्तवला होता. मात्र बुधवारी कंपनीने 84 अब्ज डॉलरचा अंदाज वर्तवला. गेल्या 16 वर्षांमध्ये पहिल्यांदा अॅपलने आपल्या अंदाजे उत्पन्नात घट केली. त्यानंतर कंपनीचे शेअर्स 10 टक्क्यांनी घसरले.

अॅपलनं गेल्या तिमाहीत होणाऱ्या अंदाजे कमाईत घट करण्याचे एक कारण चीनी बाजारात आईफोनची विक्री कमी होणे हे आहे. तर दुसरीकडे चीनची अर्थव्यवस्था ढासळत असल्याने चीनमध्ये आयफोनच्या विक्रीवर परिणाम होत आहे.

अॅपलचे सीईओ टिम कुक यांनी या घटनेला अमेरिकेचे राष्ट्राध्यक्ष डोनाल्ड ट्रम्प जबाबदार असल्याचं म्हटलं आहे. टिम कुक यांनी कंपनीच्या शेअरहोल्डर्सना सांगितले होते की, 'व्यापार युद्धाचा परिणाम आता दिसत आहे यामुळे ग्राहकांचा विश्वासही डळमळीत होऊ लागला आहे.' अॅपलला जरी मोठा फटका बसला असला तरी कंपनी दुसऱ्या क्षेत्रात नवी शाखा उघडू शकते. कंपनीकडे यासाठी पुरेसा पैसा आहे.