Cricket: IPLमध्ये बनला करोडपती, आता टीम इंडियामध्ये मिळाली जागा; वर्षभरात बदललं 'या' खेळाडूचं नशीब

आगामी न्यूझीलंड आणि बांगलादेश दौऱ्यासाठी बीसीसीआयनं सोमवारी टीम इंडियाची घोषणा केली. त्यात बांगलादेशविरुद्धच्या वन डे मालिकेसाठी उत्तर प्रदेशचा डावखुरा वेगवान गोलंदाज यश दयालला पहिल्यांदाच भारतीय संघात संधी मिळाली आहे.

24 वर्षांचा यश दयाल आतापर्यंत उत्तर प्रदेशकडून 17 फर्स्ट क्लास आणि 14 लिस्ट ए मॅचेस खेळला आहे. पण तो प्रकाशझोतात आला ते यावर्षी फेब्रुवारीत झालेल्या आयपीएलच्या मेगा लिलावात. नव्यानं आलेल्या गुजरात फ्रँचायझीनं यश दयालला तब्बल 3.2 कोटींची बोली लावून आपल्या टीममध्ये विकत घेतलं होतं.

गुजरातला चॅम्पियन बनवण्यात यश दयालचं योगदान मोठं होतं. त्यानं मोक्याच्या क्षणी विकेट काढून कॅप्टन हार्दिक पंड्याचा विश्वास सार्थ ठरवला. त्यानं 9 मॅचमध्ये 11 विकेटही घेतल्या. त्यामुळे तो बीसीसीआयच्या निवड समितीच्या रडारवर होता.

यश दयालचे वडील चंद्रपाल दयालही क्रिकेटर होते. त्यांनी उत्तर प्रदेशकडून विझी ट्रॉफीममध्ये प्रतिनिधित्व केलं होतं. पण क्रिकेट खेळण्यासाठी त्यांनी यशवर कधीही दबाव टाकला नाही. पण तो एक चांगला क्रिकेटर व्हावा हे चंद्रपाल यांचं स्वप्न होतं. अखेर यशला इंडियासाठी पहिला कॉल आला आणि त्यांचं स्वप्न पूर्ण झालं.

आयपीएलनं भारताला आजवर अनेक खेळाडू दिले आहेत. सध्या भारतीय संघात खेळत असलेले हार्दिक पंड्या, जसप्रीत बुमरा, सूर्यकुमार यादव, हर्षल पटेल, अर्शदीप सिंग ही नावं आयपीएलमधूनच चर्चेत आली. आणि आज ते आंतरराष्ट्रीय क्रिकेट गाजवतायत. त्यामुळे यश दयालकडूनही तशाच अपेक्षा आहेत.