वर्ल्ड कपआधी टीम इंडिया अडचणीत, शोधावा लागणार उपाय, अन्यथा स्वप्न तुटणार!

टीम इंडियाने 2023 च्या पहिल्या दोन वनडे सीरिज जिंकल्या आहेत. भारताने पहिले श्रीलंकेचा 3-0 ने पराभव केला, यानंतर न्यूझीलंडविरुद्ध 2-0 ने विजयी आघाडी घेतली आहे. रोहित शर्माच्या नेतृत्वात टीम इंडिया ही कामगिरी वनडे वर्ल्ड कपपर्यंत कायम ठेवण्यासाठी आग्रही असेल.

वर्ल्ड कपच्या मॅच ऑक्टोबर-नोव्हेंबर महिन्यात भारतात होणार आहे. या काळात भारतात बरीच थंडी असते, त्यामुळे धुक्याची भूमिका महत्त्वाची ठरेल. 2021 टी-20 वर्ल्ड कपमध्ये भारताचा पाकिस्तानविरुद्ध 10 विकेटने पराभव झाला होता, तेव्हाही धुक्यानेच टीम इंडियाचा घात केला होता.

टीम इंडियाचा ऑफ स्पिनर आर.अश्विनने धुक्याबाबत त्याचं मत मांडलं आहे. धुकं आणि बाऊंड्रीची लांबी या दोन गोष्टी नियंत्रित केल्या जाऊ शकत नाहीत, असं अश्विन त्याच्या युट्युब चॅनलवर म्हणाला आहे. भारताला याच गोष्टींपासून सावध राहावं लागेल, असा इशारा अश्विनने दिला आहे.

वर्ल्ड कपच्या मॅच भारतीय वेळेनुसार दुपारी 1.30 वाजता सुरू होणार आहेत. हे सामने 2 तास आधी 11.30 वाजता सुरू करण्यात यावेत, अशी मागणी अश्विनने आयसीसीकडे केली आहे. मॅच 11.30 वाजता सुरू झाल्या तर मॅचवर धुक्याचा प्रभाव कमी पडेल, असं अश्विनला वाटतं. घरच्या मैदानात खेळत असल्यामुळे भारतीय टीम वर्ल्ड कप जिंकण्याची प्रमुख दावेदार आहे, असं अश्विन म्हणाला.

2019 वर्ल्ड कपनंतर घरच्या मैदानात भारताचं रेकॉर्ड बघितलं तर टीमने 12 पैकी 9 मॅच जिंकल्या आहेत तर 3 मॅचमध्ये टीमचा पराभव झाला. इंग्लंडविरुद्ध भारताने 336 रन केले तरीही टीमला पराभवाचा सामना करावा लागला, त्यामुळे नॉकआऊट किंवा महत्त्वाच्या सामन्यात धुकं टीम इंडियाचा खेळ बिघडवू शकतं.

आव्हानाचा पाठलाग करताना भारताने 2019 वर्ल्ड कपनंतर घरच्या मैदानात 8 पैकी 7 मॅच जिंकल्या यातल्या 3 मॅचमध्ये टीमने 280 पेक्षा जास्त रन केले. आव्हानाचा पाठलाग करताना विराट कोहलीचं रेकॉर्डही शानदार आहे.

टीम इंडियासाठी वर्ल्ड कप महत्त्वाचा आहे कारण 12 वर्षात टीमला एकही आयसीसी ट्रॉफी जिंकता आलेली नाही. भारताने शेवटचा वर्ल्ड कप 2011 साली घरच्याच मैदानात जिंकला होता. तेव्हा टीमने फायनलमध्ये श्रीलंकेचा पराभव केला होता. एमएस धोनीच्या नेतृत्वात टीमने आव्हानाचा पाठलाग करत विजय मिळवला होता.