टीम इंडियाचे प्रशिक्षक रवी शास्त्रींना मिळतो इतका पगार, मिसबाह टॉप-5 मध्ये

जगातल्या सगळ्यात श्रीमंत क्रिकेट बोर्ड असलेलं बीसीसीआय (BCCI) प्रशिक्षकांनाही सर्वाधिक पगार देते. टीम इंडियाचे (Team India) मुख्य प्रशिक्षक असलेल्या रवी शास्त्री (Ravi Shastri) जगातले सर्वाधिक पगार मिळवणारे क्रिकेटचे प्रशिक्षक आहेत. सर्वाधिक पगार मिळणाऱ्या टॉप-5 प्रशिक्षकांमध्ये पाकिस्तानचा प्रशिक्षक मिसबाह उल हक याचाही समावेश आहे.

न्यूझीलंडचे कोच गॅरी स्टीड यांना वर्षाला 1.73 कोटी रुपये मिळतात. स्टीड यांच्या मार्गदर्शनलाखाली न्यूझीलंडची टीम 2019 वर्ल्ड कपच्या फायनलमध्ये पोहोचली. आता किवी टीम भारताविरुद्ध वर्ल्ड टेस्ट चॅम्पियनशीपची फायनल खेळणार आहे. यासाठी गॅरी स्टीड न्यूझीलंडच्या टीमला तयार करत आहेत.

पाकिस्तानचा प्रशिक्षक मिसबाह उल हक देखील या यादीमध्ये आहे. मागच्यावर्षी मिकी आर्थर यांच्यानंतर मिसबाहला ही जबाबदारी देण्यात आली. मिसबाह उल हकला पाकिस्तान क्रिकेट बोर्ड वर्षाला 1.79 कोटी रुपये देतं.

श्रीलंकेचे प्रशिक्षक मिकी आर्थर या यादीत चौथ्या क्रमांकावर आहेत. मिकी आर्थर वर्षाला 3.44 कोटी रुपये कमावतात. याआधी ते पाकिस्तान टीमचे प्रशिक्षक होते. श्रीलंका टीमने मागच्या चार वर्षात नऊ कर्णधार बदलले आहेत. सध्या श्रीलंका क्रिकेट बोर्डाचे खेळाडूंसोबत करारावरून वाद सुरू आहेत, पण आर्थरसोबतचा त्यांचा करार सुरक्षित आहे.

इंग्लंडचे प्रशिक्षक क्रिस सिल्व्हरवूड या यादीत तिसऱ्या क्रमांकावर आहेत. सिल्व्हरवूड यांना वर्षाला 4.65 कोटी रुपये मिळतात. त्यांच्या मार्गदर्शनात इंग्लंडने न्यूझीलंड, दक्षिण आफ्रिका आणि ऑस्ट्रेलियाला हरवलं.

ऑस्ट्रेलियाचे प्रशिक्षक जस्टीन लँगर यांना क्रिकेट ऑस्ट्रेलिया वर्षाला 4.67 कोटी रुपये देते. 2018 पासून लँगर या पदावर आहेत. बॉल छेडछाड प्रकरणानंतर डॅरेन लेहमन यांनी त्यांच्या प्रशिक्षकपदाचा राजीनामा दिला होता.

टीम इंडियाचे मुख्य प्रशिक्षक रवी शास्त्री सर्वाधिक पगार मिळणारे प्रशिक्षक आहेत. बीसीसीआय रवी शास्त्रींना वर्षाला 9.5 कोटी ते 10 कोटी रुपये देते. 2014 साली शास्त्रींना टीम इंडियाचा संचालक म्हणून निवडण्यात आलं. यानंतर 2017 साली अनिल कुंबळेने राजीनामा दिल्यानंतर शास्त्रींनी हे पद सांभाळलं.

रवी शास्त्रींच्या मार्गदर्शनात भारतीय टीमने सगळ्याच फॉरमॅटमध्ये चांगली कामगिरी केली. याचसोबत भारताने ऑस्ट्रेलियात लागोपाठ दोन वेळा टेस्ट सीरिज जिंकण्याचाही पराक्रम केला. याशिवाय इंग्लंड, न्यूझीलंड, दक्षिण आफ्रिका आणि वेस्ट इंडिजमध्ये भारताने मर्यादित ओव्हरच्या सीरिजमध्ये विजय मिळवला.