Ind vs Pak: मेलबर्नमधल्या विजयानंतर विराटच्या डोळ्यात अश्रू, पाहा महामुकाबल्यातील 'ते' भावूक क्षण

मेलबर्नच्या मैदानात टीम इंडियानं ऐतिहासिक विजयाला गवसणी घातली. वर्ल्ड कपच्या मैदानात टीम इंडियानं पुन्हा एकदा पाकिस्तानला हरवण्याचा पराक्रम गाजवला. भारताच्या या विजयाचा हीरो ठरला तो विराट कोहली. विराटनं नाबाद 82 धावांची खेळी केली. पण या खेळीनंतर विराटच्या डोळ्यात अश्रू पाहायला मिळाले. यावेळी मैदानातच विराट भावूक झालेला दिसला.

विराटची ही इनिंग त्याच्या आजवरच्या सर्वोत्तम इनिंगपैकी एक ठरावी. 4 बाद 31 अशा अडचणीच्या परिस्थितीतून विराटनं टीम इंडियाला बाहेर काढलं.

ज्यावेळी अश्विननं विजयी फटका खेळला तेव्हा टीम इंडियाच्या डग आऊटमधून सगळे खेळाडू धावत मैदानात पोहोचले आणि त्यांनी विराटला आलिंगन दिलं. क्रिकेटच्या मैदानातले ते खास क्षण होते.

टीम इंडियाचा कॅप्टन रोहित शर्मानं तर विराटला चक्क उचलून घेतलं. त्याचा व्हिडीओ सोशल मीडियावर चांगलाच व्हायरल झाला आहे.

विराटच्या या खास इनिंगनंतर पत्नी अनुष्कानंही एक भावूक पोस्ट केली. तिनं विराटच्या कारकीर्दीतील तिनं पाहिलेली ही सर्वोत्तम खेळी असल्याचं म्हटलं आहे.