IPL 2020 : 'चांगल्या कामगिरीनंतरही सूर्याला टीम इंडियामध्ये संधी का नाही?'

बीसीसीआयने ऑस्ट्रेलिया दौऱ्यासाठी भारतीय टीमची घोषणा केली आहे. आयपीएल (IPL 2020) संपल्यानंतर टीम इंडिया ऑस्ट्रेलिया दौऱ्यासाठी रवाना होईल. या दौऱ्यात भारत 3 वनडे, 3 टी-20 आणि 4 टेस्ट मॅचची सीरिज खेळणार आहे. या दौऱ्यासाठी टीम इंडियाची निवड झाल्यानंतर सोशल मीडियावर अनेक प्रश्न उपस्थित करण्यात येत आहेत. भारताचा माजी क्रिकेटपटू हरभजन सिंग याने सूर्यकुमार यादवला संधी न मिळाल्यामुळे नाराजी व्यक्त केली आहे.

निवड समितीने सूर्यकुमार यादवचं रेकॉर्ड पाहावं. त्याने रणजी ट्रॉफी आणि आयपीएलमध्ये चांगली कामगिरी केली आहे. निवड होण्यासाठी प्रत्येकाला वेगळे नियम आहेत का? असा सवाल हरभजनने विचारला आहे.

आयपीएलच्या या मोसमात सूर्यकुमार यादवने मुंबईकडून खेळताना चांगली कामगिरी केली आहे. त्याने 11 मॅचमध्ये 31.44 च्या सरासरीने 283 रन केले आहेत. या दरम्यान त्याने दोन अर्धशतकंही झळकावली आहेत.

या मोसमात तिसऱ्या क्रमांकावर बॅटिंग करणाऱ्या सूर्याने 150 च्या स्ट्राईक रेटने बॅटिंग केली आहे.

सूर्यकुमार यादव 2012 सालापासून आयपीएल खेळत आहे.