सेहवाग, द्रविड, धोनी, विराटची घेतली विकेट, आता करतोय बस ड्रायव्हरची नोकरी!

भारतीय क्रिकेटपटूंना जिकडे कोट्यवधी रुपये दिले जातात, तिकडे दुसऱ्या देशांच्या खेळाडूंवर निवृत्तीनंतर छोटी-मोठी नोकरी करण्याची वेळ येते. श्रीलंकेचा माजी ऑफ स्पिनर सूरज रणदीवही असंच करत आहे. श्रीलंकेसाठी 12 टेस्ट, 31 वनडे आणि 7 टी-20 खेळणाऱ्या सूरज रणदीववर बस ड्रायव्हरची नोकरी करण्याची वेळ आली आहे. तो मेलबर्नमध्ये बस ड्रायव्हरची नोकरी करत आहे.

सूरज रणदीव ट्रांसडेव नावाच्या फ्रांसीसी कंपनीसाठी बस चालवतो. या कंपनीचे संपूर्ण ऑस्ट्रेलियात 1200 ड्रायव्हर आहेत. बस ड्रायव्हरची नोकरी करण्यासोबतच सूरज रणदीव मेलबर्नमध्ये स्थानीक क्लबसाठी क्रिकेटही खेळतो. (Suraj Randiv Instagram)

सूरज रणदीवशिवाय चिंतका जयसिंघे आणि झिम्बाब्वेचा माजी क्रिकेटपटू वॉडिंगटन मायेंगा हेदेखील ट्रांसडेव कंपनीचे बस ड्रायव्हर आहेत. जयसिंघेने श्रीलंकेसाठी 5 टी-20 मॅच खेळल्या आहेत. तर वॉडिंगटनने झिम्बाब्वेचं एक टेस्ट आणि तीन वनडेमध्ये प्रतिनिधीत्व केलं. (Photo- Wadington Mayenga Instagram)

सूरज रणदीव काहीच दिवसांपूर्वी ऑस्ट्रेलियन टीमसोबत सराव करताना दिसला होता. भारताविरुद्धच्या टेस्ट सीरिजमध्ये अश्विनचा सामना करण्यासाठी ऑस्ट्रेलियाने सूरज रणदीवला नेटमध्ये बॉलिंगसाठी बोलावलं होतं.

रणदीवने टेस्टमध्ये 43, वनडेमध्ये 36 आणि टी20 मध्ये 7 विकेट घेतल्या आहेत. यामध्ये सेहवाग, राहुल द्रविड, एमएस धोनी आणि विराट कोहली यांच्यासारख्या दिग्गजांच्या विकेटचाही समावेश आहे. रणदीवने श्रीलंकेच्या प्रथम श्रेणी क्रिकेटमध्ये 681, लिस्ट एमध्ये 189 आणि टी-20 मध्ये 62 विकेट घेतल्या आहेत. संपूर्ण करियरमध्ये 932 विकेट घेणारा हा खेळाडू आता बस चालवण्यासाठी मजबूर आहे. (Suraj Randiv Instagram)