पहिल्याच मॅचमध्ये सचिन, सेहवाग द्रविडची विकेट, 6 वर्ष टीमबाहेर, आता घेतली निवृत्ती

आपल्या पहिल्याच टेस्टमध्ये सचिन तेंडुलकर, राहुल द्रविड आणि वीरेंद्र सेहवाग या दिग्गजांना आऊट करणाऱ्या श्रीलंकेचा फास्ट बॉलर धामिका प्रसाद याने आंतरराष्ट्रीय क्रिकेटमधून निवृत्ती घेतली आहे.

शुक्रवारी धामिका प्रसाद याने आपण क्रिकेटमधून संन्यास घेत असल्याची घोषणा केली. धामिका प्रसादने श्रीलंकेसाठी 25 टेस्ट, 24 वनडे खेळल्या, यात त्याच्या नावावर एकूण 107 विकेट आहेत.

2008 साली कोलंबो टेस्टमध्ये सचिन, राहुल द्रविड यांच्यासारख्या दिग्गजांची विकेट घेतल्यामुळे धामिका प्रसाद चर्चेत आला होता. वीरेंद्र सेहवाग धामिका प्रसादची पहिली टेस्ट विकेट होती. त्या मॅचमध्ये श्रीलंकेचा 8 विकेटने विजय झाला होता.

धामिका प्रसाद श्रीलंकेच्या सगळ्यात जलद फास्ट बॉलरपैकी एक होता. तो ताशी 145 किमीपर्यंतच्या वेगाने बॉलिंग करायचा. पण अपेक्षेप्रमाणे धामिका प्रसादची कारकिर्द बहरली नाही.

धामिका प्रसादला 2015 साली वनडे आणि टेस्ट टीममधून बाहेर करण्यात आलं, यानंतर त्याची श्रीलंकेच्या टीममध्ये निवड झाली नाही. 6 वर्ष टीमच्या बाहेर राहिल्यानंतर अखेर धामिका प्रसादने निवृत्त व्हायचं ठरवलं. आंतरराष्ट्रीय क्रिकेटमध्ये निराशाजनक कामगिरी करणाऱ्या धामिका प्रसादने प्रथम श्रेणी क्रिकेटमध्ये जबरदस्त प्रदर्शन केलं. 130 मॅचमध्ये त्याने 351 विकेट घेतल्या. तर लिस्ट ए क्रिकेटमध्ये धामिका प्रसादने 119 मॅचमध्ये 154 विकेट घेतल्या.