IPL 2023: युवी अन् इरफान पठाणची भूक भागवण्यासाठी प्रीतीने काय केलं? 14 वर्षांनी केला खुलासा

आयपीएलमध्ये क्रिकेट आणि मनोरंजन असा दोन्हीचा थरार यंदा बघायला मिळत आहे. मैदानाशिवाय क्रिकेटच्या मैदानाबाहेरही अनेक कार्यक्रमांचं आयोजन केलं जातं. याबद्दल चाहत्यांच्या मनातही खूप उत्सुकता असते. अशाच काही घटनांबद्दल खेळाडू आणि संघमालक त्यांच्या आठवणी सामन्यावेळी सांगतात. अशीच एक भन्नाट आठवण पंजाब किंग्जची मालकीन असलेल्या प्रीती झिंटाने सांगितली आहे.

प्रीती झिंटाने सांगितले की, 2009 मध्ये जेव्हा दक्षिण आफ्रिकेत आयपीएलचे आयोजन करण्यात आले होते तेव्हा ती मैदानावर संघासोबत होती. एका सामन्याआधी प्रीतीने खेळाडूंना सांगितले की, त्यांनी हा सामना जिंकला तर ती स्वत: आलू पराठा बनवून खायला घालेल.

प्रीती झिंटाने खेळाडूंना शब्द दिला पण तिला पुढे काय होईल याची कल्पना नव्हती. त्यावेळी किंग्ज इलेव्हन पंजाबच्या संघाने त्या सामन्यात विजय मिळवला होता.

किंग्ज इलेव्हन पंजाबचा संघ सामना जिंकल्यानंतर हॉटेलवर परतला. पण युवराज सिंग, इरफान पठाण यांना हॉटेलचे जेवण आवडले नाही. तेव्हा क्रिकेटपटूंनी प्रीती झिंटाने दिलेल्या ऑफरची आठवण करून देत आलू पराठा खाण्याची मागणी केली. प्रीतीने आनंदाच्या भरात आलू पराठे करायला सुरुवात केली. पण जेव्हा प्लेअर्सनी खायला सुरुवात केली तेव्हा तिला घाम फुटला.

प्रिती झिंटा म्हणाली, 'प्लेअर्स किती खाऊ शकतात हे मला त्या दिवशी कळलं. मला एकूण 120 आलू पराठे बनवायचे होते.' खेळाडूंची भूक भागेपर्यंत पराठा बनवताना प्रीती झिंटाची दमछाक झाली.

मुलाखतीच्या शेवटी प्रिती झिंटाने गंमतीने असं म्हटलं की की, 'तेव्हापासून मी स्वतः आलू पराठे बनवणे बंद केले आहे.' प्रीती झिंटाने सांगितलेल्या या गोष्टीची चर्चा सध्या सोशल मीडियावर होतेय.