IPL 2020 : मुंबई बनली जगातली 'नंबर 1' टीम, मैदानात उतरताच घडवला इतिहास

आयपीएल (IPL 2020) च्या यंदाच्या मोसमात मुंबई (Mumbai Indians)च्या टीमने जबरदस्त कामगिरी केली आहे. या हंगामात प्ले-ऑफमध्ये पोहोचणारी मुंबई पहिली टीम ठरली आहे. आयपीएलच्या इतिहासात सगळ्यात यशस्वी असलेल्या मुंबईने दिल्ली (Delhi Capitals)विरुद्धच्या मॅचमध्ये मैदानात उतरताच नवा विक्रम केला आहे. मुंबईची टीम जगात सर्वाधिक टी-20 मॅच खेळणारी टीम बनली आहे. मुंबईने इंग्लंडची काऊंटी टीम असलेल्या समरसेटचं रेकॉर्ड मोडलं आहे.

मुंबईने आतापर्यंत 222 टी-20 मॅच खेळल्या आहे. मुंबईनंतर समरसेटने 221, हॅम्पशायरने 217 सस्केसने 212 आणि सरेने 211 टी-20 मॅच खेळल्या आहेत.

मुंबई आयपीएल इतिहासात 200 मॅच खेळणारीही पहिलीच टीम बनली आहे. मुंबईनंतर बँगलोरने 193 मॅच खेळल्या, कोलकाताने 191 आणि दिल्लीने 190 मॅच खेळल्या आहेत.

मुंबई आयपीएल इतिहासातली सगळ्यात यशस्वी टीमही आहे. मुंबईने 4 वेळा आयपीएल ट्रॉफी जिंकली आहे. 2020 सालीही मुंबई ज्या पद्धतीने खेळत आहे, ते बघता पाचव्यांदा मुंबई आयपीएल ट्रॉफीवर आपलं नाव कोरू शकतं.