IPL 2020 : 'भावा माझाच विक्रम मोडलास!', धोनीसाठी रैनाचा स्पेशल मेसेज

आयपीएल (IPL 2020) च्या 14व्या मॅचमध्ये उतरताच एमएस धोनी (MS Dhoni) ने नव्या विक्रमाला गवसणी घातली. आयपीएल इतिहासात सर्वाधिक मॅच खेळण्याचा रेकॉर्ड धोनीच्या नावावर झाला आहे. धोनीने आयपीएलमध्ये आतापर्यंत 194 मॅच खेळल्या आहेत. सर्वाधिक मॅच खेळण्याच्या बाबतीत त्याने रैनाला मागे टाकलं आहे.

सुरेश रैना (Suresh Raina)ने आयपीएलमध्ये 193 मॅच खेळल्या आहेत. रैनानंतर रोहित शर्मा (Rohit Sharma) ने 192 आणि दिनेश कार्तिक (Dinesh Karthik) ने 185 मॅचमध्ये प्रतिनिधित्व केलं आहे.

धोनीने सर्वाधिक मॅच खेळण्याचा विक्रम करताच सुरेश रैनाने त्याला खास शुभेच्छा दिल्या. एमएस धोनीने माझा विक्रम तोडला, याचा मला आनंद आहे. चेन्नईची टीम यंदाची आयपीएल स्पर्धा जिंकेल, असा विश्वासही रैनाने व्यक्त केला. सोशल मीडियावर रैनाने हा संदेश दिला आहे.

सुरेश रैनाने आयपीएलच्या 13व्या मोसमातून माघार घेतली. आयपीएल खेळण्यासाठी रैना चेन्नईच्या टीमसोबत युएईला गेला, पण अचानक त्याने भारतात परतण्याचा निर्णय घेतला. रैनाच्या या निर्णयामुळे चेन्नईची टीम त्याच्यावर चांगलीच नाराज झाली. एवढच नाही तर चेन्नई सुपरकिंग्ज रैनाचा करारही रद्द करू शकते, अशा बातम्या प्रसिद्ध झाल्या आहेत. जर असं झालं तर रैना पुढच्या मोसमापासून चेन्नईच्या पिवळ्या जर्सीमध्ये दिसणार नाही.