क्रिकेटर मोहम्मद शमीला मोठा झटका! पत्नी हसीन जहाँबाबत कोर्टानं दिला निर्णय

भारतीय क्रिकेट टीमचा गोलंदाज मोहम्मद शमी आणि त्याची पत्नी हसीन जहाँ त्यांच्या वैवाहिक आयुष्यामुळे नेहमीच चर्चेत असतात. पती मोहम्मद शमीसोबत असलेल्या वादामुळे हसीन ही गेल्या अनेक दिवसांपासून मुलीसोबत वेगळी राहत आहे. कोलकाता येथील न्यायालयानं मोहम्मद शमी आणि त्याची पत्नी हसीन जहाँ यांच्याबाबत एक महत्त्वाचा निर्णय दिला आहे.

कोलकाता न्यायालयानं शमीला त्याची पत्नी हसीन जहाँला मासिक 50 हजार रुपये पोटगी देण्याचे आदेश दिलेत. अलीपूर न्यायालयाच्या न्यायाधीश अनिंदिता गांगुली यांनी हा निर्णय दिला.

मात्र, हसीन जहाँ या निर्णयावर खूश नाही. ती आता या निकालाविरोधात उच्च न्यायालयात अपील करू शकते. कारण 2018 मध्ये हसीन जहाँने महिन्याला 10 लाख रुपये पोटगी मिळावी, अशी मागणी करणारी कायदेशीर याचिका दाखल केली होती. या याचिकेत तिनं म्हटलं होतं की, मला वैयक्तिक खर्चासाठी 7 लाख रुपये आणि मुलीच्या संगोपनासाठी दरमहा 3 लाख रुपये पोटगी हवी आहे.

काही दिवसांपूर्वीच भारतीय क्रिकेट टीमने न्यूझीलंडविरुद्ध वन-डे सीरिज खेळली. यात 32 वर्षीय शमीनं न्यूझीलंडविरुद्धच्या सामन्यांमध्ये शानदार बॉलिंगचे प्रदर्शन केले. परंतु अशातच वैयक्तिक आयुष्यामुळे शमीच्या चिंतेत आणखी भर पडली आहे.

2018 मध्ये शमीची पत्नी हसीन जहाँ हिने त्याच्यावर घरगुती हिंसाचार, मॅच फिक्सिंग, हुंडाबळी असे गंभीर आरोप लावले होते. पत्नीच्या आरोपांवर शमीनं स्पष्टीकरण दिलं होतं.

शमी म्हणाला होता, 'हसीन आणि तिचे कुटुंबीय म्हणत आहेत की सर्व मुद्द्यांवर बसून चर्चा करू. पण त्यांना कोण भडकावत आहे, हे मला माहीत नाही. माझ्या वैयक्तिक आयुष्याबद्दल जे काही आरोप करण्यात आलेत, ते पूर्णपणे खोटे आहेत. माझ्याविरुद्ध काहीतरी मोठं षडयंत्र रचलं जातंय. माझी बदनामी करण्याचा किंवा करिअर संपवण्याचा हा प्रयत्न आहे. देशाशी गद्दारी करण्यापेक्षा मी मृत्यू पत्करेन,’ असेही शमीनं म्हटलं होतं.

दरम्यान, आता शमी आणि त्याच्या पत्नीबाबत न्यायालयाचा निर्णय आला आहे. यामुळे हे प्रकरण येथेच संपते की उच्च न्यायालयात जाते, हे लवकरच स्पष्ट होईल.