IPL 2021 : हसरंगा ते रशीद, आयपीएलचा दुसरा राऊंड खेळणार हे 9 क्रिकेटपटू

आयपीएलच्या यंदाच्या मोसमाच्या दुसऱ्या सत्राला (IPL 2021) 19 सप्टेंबरपासून युएईमध्ये सुरुवात होईल. त्याआधी आयपीएल टीमनी दुखापत झालेल्या आणि उपलब्ध नसलेल्या खेळाडूंऐवजी बदली खेळाडूंच्या नावांची घोषणा केली आहे. आतापर्यंत वेगवेगळ्या टीममध्ये 9 खेळाडू सामील झाले आहेत.

श्रीलंकेचा लेग स्पिनर वानिंदू हसरंगा (Wanindu Hasaranga) याला रॉयल चॅलेंजर्स बँगलोरने (RCB) टीममध्ये घेतलं आहे. ऑस्ट्रेलियाचा लेग स्पिनर एडम झम्पाच्याऐवजी (Adam Zampa) हसरंगा आरसीबीकडून खेळेल.

राजस्थान रॉयल्सने (Rajasthan Royals) आयपीएलच्या दुसऱ्या राऊंडसाठी टी-20 क्रमवारीतला नंबर-1 बॉलर तबरेज शम्सीसोबत (Tabraiz Shamsi) करार केला आहे. दक्षिण आफ्रिकेचा हा चायनामन बॉलर गेल्या काही काळापासून चांगल्या फॉर्ममध्ये आहे. फास्ट बॉलर एन्ड्रयू टायच्याऐवजी राजस्थानने त्याला टीममध्ये घेतलं आहे.

पंजाब किंग्सने (Punjab Kings) इंग्लंडचा लेग स्पिनर आदिल रशीदला (Adil Rashid) टीममध्ये निवडलं आहे. आपल्या गुगलीसाठी प्रसिद्ध असलेला रशीद पहिल्यांदाच आयपीएल खेळणार आहे. आयपीएल 2021 च्या लिलावामध्ये त्याला कोणत्याही टीमने विकत घेतलं नव्हतं. झाय रिचर्डसनच्या जागी रशीद पंजाबकडून खेळेल.

न्यूझीलंडचा बॅट्समन ग्लेन फिलिप्स (Glenn Phillips) राजस्थान रॉयल्सकडून खेळेल. फिलिप्सला दुखापतग्रस्त जोफ्रा आर्चरऐवजी टीममध्ये घेतलं गेलं आहे.

ऑस्ट्रेलियाचा युवा फास्ट बॉलर नॅथन एलिसला (Nathan Ellis) पंजाबनेच रिले मेरेडिथऐवजी संधी दिली आहे. याशिवाय एलिस टी-20 वर्ल्ड कपसाठीच्या ऑस्ट्रेलियाच्या राखीव खेळाडूंमध्येही आहे.

श्रीलंकेचा फास्ट बॉलर दुष्मंता चमीराला (Dushmantha Chameera) आरसीबीने डॅनियल सॅम्सच्या जागी टीममध्ये निवडलं आहे. चमीराने यावर्षी 9 टी-20 मॅचमध्ये 14 विकेट घेतल्या आहेत.

आरसीबीने केन रिचर्डसनऐवजी इंग्लंडचा डावखुरा फास्ट बॉलर जॉर्ज गार्टनला टीममध्ये घेतलं आहे.

आरसीबीमध्येच न्यूझीलंडच्या फिन एलनऐवजी टीम डेव्हिडला निवडण्यात आलं आहे. टीम डेव्हिड सिंगापूरचा पहिला क्रिकेटपटू आहे, जो आयपीएल खेळेल.

कोलकाता नाईट रायडर्सने ऑस्ट्रेलियाच्या पॅट कमिन्सऐवजी न्यूझीलंडच्या टीम साऊदीला संधी दिली आहे.