IPL 2020 : चेन्नई आयपीएलमधून बाहेर, धोनी युएईतून पोहोचला रांचीला

आयपीएल (IPL 2020) मधल्या सगळ्यात यशस्वी टीमपैकी एक असलेल्या चेन्नई (CSK)च्या पदरी यंदा निराशा पडली. चेन्नईला पहिल्यांदाच आयपीएलच्या प्ले-ऑफमध्ये प्रवेश मिळवता आला नाही. धोनीच्या नेतृत्वात खेळणारी चेन्नई यंदा पॉईंट्स टेबलमध्ये सातव्या क्रमांकावर राहिली. स्पर्धेतून बाहेर झाल्यानंतर एमएस धोनी युएईतून रांचीला परतला आहे.

चेन्नईच्या टीममधले जे खेळाडू ऑस्ट्रेलिया दौऱ्यासाठी जाणार नाहीत, ते भारतात परतले आहेत. चेन्नईचा बॉलर कर्ण शर्माने विमानात धोनी आणि मोनू कुमार याच्यासोबतचा एक सेल्फी सोशल मीडियावर शेयर केला.

कर्ण शर्माने हा फोटो सोशल मीडियावर शेयर केल्यानंतर चांगलाच व्हायरल झाला. धोनी सोमवारी रांचीमध्ये परतला आहे.

15 ऑगस्टला धोनीने आंतरराष्ट्रीय क्रिकेटमधून संन्यास घेतला. यानंतर धोनी पुढच्या आयपीएलमध्ये दिसणार का नाही, याची उत्सुकता निर्माण झाली होती, पण आपण पुढच्या आयपीएलमध्येही खेळणार असल्याचं सांगून धोनीने त्याच्या चाहत्यांना दिलासा दिला.

या मोसमात चेन्नईने 14 पैकी 6 मॅच जिंकल्या, तर 8 मॅचमध्ये त्यांचा पराभव झाला.