IPL 2020 : वॉर्नर झाला आयपीएलमधला सगळ्यात 'महान' खेळाडू

आयपीएल (IPL 2020)च्या पंजाब (KXIP)विरुद्धच्या मॅचमध्ये हैदराबाद (SRH)च्या बॅट्समननी धमाकेदार बॅटिंग केली. टॉस जिंकून पहिले बॅटिंगचा निर्णय घेणाऱ्या हैदराबादने 20 ओव्हरमध्ये 201 रन केले. हैदराबादसाठी ओपनर जॉनी बेयरस्टोने सर्वाधिक 97 रनची खेळी केली, तर कर्णधार डेव्हिड वॉर्नरनेही शानदार अर्धशतक केलं. वॉर्नरने 40 बॉलमध्ये 52 रन केले. या अर्धशतकासोबतच डेव्हिड वॉर्नरने इतिहास घडवला. वॉर्नरने असं रेकॉर्ड केलं जिथपर्यंत अजून कोणीही पोहोचलेलं नाही.

डेव्हिड वॉर्नरची आयपीएलमधली ही 50 वी अर्धशतक किंवा त्यावरची खेळी होती. वॉर्नरनंतर विराट कोहलीने 42 वेळा 50 पेक्षा जास्त रन केले आहेत. तर रोहित शर्मा आणि सुरेश रैना यांनी 39-39 वेळा 50 पेक्षा जास्त रनचा आकडा गाठला आहे.

या विक्रमासोबतच वॉर्नरने आणखी एक रेकॉर्ड स्वत:च्या नावावर केला. पंजाबविरुद्ध वॉर्नरचं हे लागोपाठ 9 वे अर्धशतक होतं. वॉर्नरने पंजाबविरुद्ध 58, 81, 59, 52, 70, 51, 70, 81 आणि 52 रन केले आहेत.

वॉर्नरचं पंजाबविरुद्धचं रेकॉर्ड उत्कृष्ट आहे. त्याने पंजाबविरुद्ध 17 मॅचमध्ये 54 च्या सरासरीने 819 रन केले आहेत, यामध्ये 10 अर्धशतकांचा समावेश आहे.