IND vs SL : क्रिकेट चाहत्यांसाठी आनंदाची बातमी, भारत-श्रीलंका सीरिज अशी पाहा फुकटात!

भारत-श्रीलंका (India vs Sri Lanka) यांच्यातल्या वनडे आणि टी-20 सीरिजला पुढच्या आठवड्यापासून सुरुवात होणार आहे. या दौऱ्यात टीम इंडिया 3 वनडे आणि 3 टी-20 अशा एकूण 6 मॅच खेळणार आहे. सगळ्यात आधी वनडे सीरिज होणार असून याची सुरुवात 13 जुलैला होईल, तर टी-20 सीरिज 21 जुलैपासून सुरू होणार आहे.

ही सीरिज सुरू व्हायच्या आधी चाहत्यांसाठी चांगली बातमी समोर आली आहे. भारत-श्रीलंका सीरिज चाहत्यांना फुकटात पाहता येणार आहे. या सीरिजचं प्रसारण सोनी नेटवर्कशिवाय डीडी स्पोर्ट्सवरही होणार आहे.

वनडे आणि टी-20 सीरिजचे सामने किती वाजता सुरू होतील, याची घोषणा करण्यात आली आहे. वनडे सीरिजच्या मॅच भारतीय वेळेनुसार दुपारी 2.30 वाजता सुरू होतील. तर टी-20 सीरिज संध्याकाळी 7.30 वाजता खेळवली जाईल.

वनडे सीरिजआधी श्रीलंका टीमला मोठा धक्का लागला आहे. टीमचा माजी कर्णधार एन्जलो मॅथ्यूज (Angelo Mathews) याने सीरिज खेळायला नकार दिला आहे, तसंच तो निवृत्त होणार असल्याचंही वृत्त आहे. मॅथ्यूजने बोर्डासोबत सुरू असलेल्या कराराच्या वादामुळे माघार घेतल्याचं सांगितलं जात आहे. श्रीलंकेच्या 30 पैकी 29 खेळाडूंनी नव्या करारावर स्वाक्षऱ्या केल्या आहेत.

वनडे आणि टी-20 सीरिजसाठी श्रीलंकन टीमची घोषणा करण्यात आलेली नाही. श्रीलंकेचा बांगलादेश आणि इंग्लंडविरुद्धच्या सीरिजमध्ये पराभव झाला. मागच्या एका वर्षात टीमने फक्त 1 वनडे, 1 टी-20 आणि 1 टेस्ट मॅचच जिंकली.

दुसरीकडे भारताने श्रीलंका दौऱ्यासाठी युवा खेळाडूंना संधी दिली आहे. टीमचं नेतृत्व शिखर धवनकडे (Shikhar Dhawan) तर उपकर्णधार भुवनेश्वर कुमार (Bhuvneshwar Kumar) आहे. राहुल द्रविडकडे (Rahul Dravid) मुख्य प्रशिक्षकपदाची जबाबदारी आहे.

भारतीय टीम : शिखर धवन (कर्णधार), भुवनेश्वर कुमार (उपकर्णधार), पृथ्वी शॉ, देवदत्त पडिक्कल, ऋतुराज गायकवाड, सूर्यकुमार यादव, मनीष पांडे, हार्दिक पांड्या, नीतीश राणा, इशान किशन, संजू सॅमसन, युझवेंद्र चहल, राहुल चाहर, कृष्णप्पा गौतम, कृणाल पांड्या, कुलदीप यादव, वरुण चक्रवर्ती, दीपक चाहर, नवदीप सैनी, चेतन सकारिया नेट बॉलर : इशान पोरेल, संदीप वॉरियर, अर्शदीप सिंग, साई किशोर, सिमरजीत सिंग