IND vs ENG : धोनीकडून काहीच शिकला नाही विराट, किती वेळा करणार तीच चूक?

विराट कोहलीची (Virat Kohli) चुकीचा डीआरएस (DRS) घेण्याची चूक पुन्हा एकदा प्रकर्षाने जाणवली. इंग्लंडविरुद्धच्या (India vs England) लॉर्ड्स टेस्टच्या दुसऱ्या दिवशीही विराटने पुन्हा एकदा तिच चूक केली. याआधीही विराट कोहलीवर डीआरएसमुळे अनेकवेळा टीका झाली आहे. विराट आणि डीआरएस यांच्यात 36 चा आकडा आहे, असंच म्हणावं लागेल.

भारत-इंग्लंड यांच्यातल्या दुसऱ्या टेस्टच्या दुसऱ्या दिवशीही विराट कोहलीने कारण नसताना डीआरएस घेतला, यावेळी त्याला टीम इंडियाच्या इतर खेळाडूंनी थांबवण्याचाही प्रयत्न केला, पण विराटने कोणाचंच ऐकलं नाही.

लॉर्ड्स टेस्टच्या दुसऱ्या दिवशी मोहम्मद सिराजने (Mohammad Siraj) टाकलेला बॉल जो रूटच्या (Joe Root) पॅडला लागला, यानंतर खेळाडूंनी एलबीडब्ल्यूसाठी (LBW) अपील केलं. अंपायरने रूटला नॉट आऊट दिलं, यानंतर सिराजच्या सांगण्यावरून विराटने डीआरएस घेतला, पण टीमच्या पदरी निराशा आली आणि एक रिव्ह्यू फुकट गेला.

यानंतर पुन्हा एकदा सिराजच्याच बॉलिंगवर रूटविरुद्ध एलबीडब्ल्यूचं अपील करण्यात आलं. ऋषभ पंतने (Rishabh Pant) विराटला डीआरएस न घेण्याचा सल्ला दिला, पण तरीही विराटने डीआरएस घेतला आणि भारताने लागोपाठ दुसरा रिव्ह्यू गमावला.

टीम इंडियाने घेतलेल्या मागच्या 24 रिव्ह्यूपैकी 21 रिव्ह्यू फुकट घालवले आहेत, तर फक्त 3 रिव्ह्यू टीम इंडियाच्या बाजूने आले. डीआरएसच्या बाबतीत विराट बहुतेकवेळा चुकीचाच ठरत आहे. कॉमेंटेटर्सनीही विराट बॉलर्सचं ऐकून लवकर रिव्ह्यू घेतो, असं मत मांडलं.

विराट कोहलीला रिव्ह्यू घेताना अडचणींचा सामना करावा लागतो, पण भारताचा माजी कर्णधार एमएस धोनी (MS Dhoni) मात्र याबाबतीत कायमच यशस्वी ठरायचा. धोनीचे निर्णय इतके योग्य असायचे की त्याचे चाहते DRS ला धोनी रिव्ह्यू सिस्टीम म्हणायचे. कोहली बराच काळ धोनीसोबत खेळला, तरीही डीआरएस घेताना विराट एवढा अपयशी का ठरतो, असा प्रश्न चाहत्यांना सतावत आहे.