IND vs ENG : ब्रेकनंतर टीम इंडियाचे हे खेळाडू उतरले मैदानात, डरहममध्ये 'विजयाची तयारी' सुरू

वर्ल्ड टेस्ट चॅम्पियनशीप फायनल गमावल्यानंतर आता टीम इंडियासमोर इंग्लंडविरुद्धच्या टेस्ट सीरिजचं (India vs England Test Series)आव्हान आहे. ही सीरिज कठीण असल्यामुळे टीम इंडियाला खूप मेहनत करावी लागणार आहे. यासाठी भारतीय खेळाडूंनी डरहममध्ये सरावाला सुरुवात केली आहे. 20 जुलैपासून तीन दिवसांच्या सराव सामन्याला सुरुवात होणार आहे.

बीसीसीआयने शनिवारी टीम इंडियाच्या सरावाचे फोटो सोशल मीडियावर पोस्ट केले. भारतीय बॅट्समननी सराव सामन्याआधी बॅटिंग प्रॅक्टिस केली. यामध्ये कर्णधार विराट कोहली (Virat Kohli) रोहित शर्मा (Rohit Sharma) घाम गाळताना दिसले.

केएल राहुल (KL Rahul) यानेही नेटमध्ये सराव केला. ऋषभ पंत (Rishabh Pant) याला कोरोनाची लागण झाल्यामुळे केएल राहुल सराव सामन्यात विकेट कीपिंग करणार आहे. इंग्लंडविरुद्धच्या टेस्ट सीरिजमध्येही त्याला मधल्या फळीत खेळण्याची संधी मिळू शकते, असं बोललं जात आहे.

भारतीय बॅट्समनशिवाय बॉलर्सनीही नेटमध्ये जोरदार सराव केला. मोहम्मद शमी, मोहम्मद सिराज, इशांत शर्मा आणि आर.अश्विन सराव करताना दिसले.

अश्विनने डरहममध्ये यायच्या आधी आपला फॉर्म दाखवून दिला. काऊंटी क्रिकेटमध्ये सरेकडून खेळताना त्याने 27 रन देऊन 6 विकेट घेतल्या.

टेस्ट सीरिजआधी टीम इंडियासाठी सराव सामना खूप महत्त्वाचा आहे, कारण भारताचे वरिष्ठ खेळाडू अजिबात फॉर्ममध्ये नाहीत. कर्णधार विराट कोहली आणि उपकर्णधार अजिंक्य रहाणे यांच्या बॅटमधून रन येत नाहीत. तर फास्ट बॉलर बुमराहची कामगिरीही निराशाजनक झाली आहे.

मोहम्मद शमीने वर्ल्ड टेस्ट चॅम्पियनशीप फायनलमध्ये उत्कृष्ट बॉलिंग केली. इंग्लंडविरुद्धच्या टेस्ट सीरिजमध्येही तो खेळेल, तसंच मोहम्मद सिराजलाही संधी दिली जाऊ शकते. भारत-इंग्लंड यांच्यातली पहिली टेस्ट 4 ऑगस्टपासून सुरू होणार आहे.