IND vs ENG : लीड्सवर लाज घालवली, टीम इंडियाच्या पराभवाची 5 कारणं

इंग्लंडविरुद्धच्या तिसऱ्या टेस्टमध्ये टीम इंडियाचा (India vs England) लाजिरवाणा पराभव झाला. चौथ्या दिवशी टीम इंडियाचा 278 रनवर ऑल आऊट झाला आणि भारताने ही मॅच इनिंग आणि 76 रनने गमावली. तिसऱ्या दिवसाची सुरुवात टीम इंडियाने 215/2 अशी केली होती, पण 63 रनमध्ये उरलेल्या 8 विकेट गेल्या. पुजारा, विराट, रहाणे आणि ऋषभ पंत ही टीम इंडियाची मधली फळी इंग्लंडच्या बॉलिंगसमोर कोसळली. आता 5 टेस्ट मॅचची ही सीरिज 1-1 ने बरोबरीत आहेत. टीम इंडियाच्या या पराभवाला त्यांच्याच चुका जबाबदार आहेत.

खराब शॉट सिलेक्शन- भारतीय टीमची बॅटिंग इंग्लंडपेक्षा खूप जास्त अनुभवी आहे, पण तरीही खेळाडूंना या अनुभवाचा फायदा उचलता आला नाही. भारताचे हे अनुभवी बॅट्समन लीड्समध्ये सपशेल अपयशी ठरले. विराट (Virat Kohli), पुजारा, (Cheteshwar Pujara) राहुल, रहाणे (Ajinkya Rahane) आणि ऋषभ पंत (Rishabh Pant) यांचं शॉट सिलेक्शन खराब होतं.

तंत्रामध्ये दोष- स्विंग होणाऱ्या बॉलसमोर खेळताना हलक्या हाताने शॉट मारण्याची गरज असते, यामुळे बॉल स्लिपमध्ये पोहोचू शकत नाही. भारतीय बॅट्समननी मात्र कडक हातांनी शॉट मारले, ज्यामुळे विकेट कीपर आणि स्लिपमधल्या खेळाडूंनी कॅच पकडले.

अंडरसन-रॉबिनसनची भेदक बॉलिंग- स्टुअर्ट ब्रॉड सीरिजमधून बाहेर झाला असला तरी ओली रॉबिनसनने त्याची कमी जाणवू दिली नाही. दुसऱ्या इनिंगमध्ये रॉबिनसनने (Ollie Robinson) भारताच्या 5 विकेट घेतल्या. यामध्ये विराट कोहली, रोहित शर्मा, चेतेश्वर पुजारा यांच्यासारख्या बॅट्समनचा समावेश आहे. तर पहिल्या इनिंगमध्ये जेम्स अंडरसनने (James Anderson) फक्त 6 रनमध्येच भारताच्या सुरुवातीच्या 3 बॅट्समनना आऊट केलं.

जो रूटदेखील (Joe Root) लीड्समधल्या भारताच्या पराभवाचं प्रमुख कारण ठरला. या सामन्यात भारताची बॅटिंग पत्त्याच्या बंगल्याप्रमाणे कोसळली, पण इंग्लंडच्या कर्णधाराने 121 रनची खेळी केली. रूटचं या सीरिजमधलं हे लागोपाठ तिसरं शतक होतं. रूटला आऊट करण्याची कोणतीही रणनिती सध्या भारतीय बॉलर्सकडे दिसत नाही.

विराटला कळलं नाही पिच- भारतीय टीमच्या पराभवाचं कारण पिच न कळणंही आहे. या सामन्यात विराट कोहलीने टॉस जिंकून पहिले बॅटिंगचा निर्णय घेतला, पण मॅचचा पहिला तासच टीम इंडियासाठी भारी पडला. ढगाळ वातावरणात इंग्लंडच्या बॉलर्सनी टीम इंडियाचा 78 रनवर ऑल आऊट केला, यानंतर टीमला पुनरागमन करणं कठीण झालं.