IND vs AUS : रोहित-गिलची जोडी, 53 वर्षानंतर भारताने केलं हे रेकॉर्ड

ऑस्ट्रेलियाविरुद्ध तिसऱ्या टेस्टमधून रोहित शर्माचं पुनरागमन झालं. रोहित शर्मा आणि शुभमन गिल या मॅचमध्ये ओपनिंगला बॅटिंगला आले. टेस्ट क्रिकेटमध्ये हे दोघं पहिल्यांदाच एकत्र खेळत होते. गिलने मागच्याच मॅचमधून टेस्ट क्रिकेटमध्ये पदार्पण केलं होतं.

तिसऱ्या टेस्टमध्ये गिल आणि रोहितच्या जोडीने भारताला चांगली सुरूवात करून दिली. या दोघांमध्ये पहिल्या इनिंगमध्ये 70 रनची पार्टनरशीप झाली, तर दुसऱ्या इनिंगमध्ये दोघांनी 71 रनची पार्टनरशीप केली.

याचसोबत या जोडीने नवीन रेकॉर्ड आपल्या नावावर केलं. भारतीय क्रिकेट टीमच्या ओपनरनी दुसऱ्यांदा ऑस्ट्रेलियात टेस्टच्या दोन्ही इनिंगमध्ये 50 पेक्षा जास्त रनची पार्टनरशीप केली. याआधी 1967-68 साली भारताच्या ओपनरनी अशी कामगिरी केली होती.

भारताबाहेर चौथ्या इनिंगमध्ये 50 पेक्षा जास्त रनची ओपनिंग पार्टनरशीप टीम इंडियाने याआधी 2006 साली केली होती. वेस्ट इंडिजविरुद्ध वसीम जाफर आणि सेहवाग यांच्यात 109 रनची पार्टनरशीप झाली होती. आशिया खंडाबाहेर दोन्ही इनिंगमध्ये 50 पेक्षा जास्त रन करण्याची भारताची ही आठवी वेळ आहे. याआधी 2018 साली ट्रेन्ट ब्रिज टेस्टमध्ये इंग्लंडविरुद्ध शिखर धवन आणि केएल राहुल यांच्यात दोन्ही इनिंगमध्ये 50 रनची पार्टनरशीप झाली होती.

टेस्टच्या दोन्ही इनिंगमध्ये रोहित आणि गिलने 20 पेक्षा जास्त ओव्हर बॅटिंग केली. याआधी सेहवाग आणि गंभीर या जोडीने पाकिस्तानविरुद्ध 2004-05 साली 23.2 ओव्हर आणि 23.4 ओव्हर बॅटिंग केली होती. होती. पहिल्या इनिंगमध्ये गिल 50 रन करून तर रोहित 26 रनवर आऊट झाला. दुसऱ्या इनिंगमध्ये गिलने 31 आणि रोहितने अर्धशतक केलं.