IND vs ENG : भारतीय फास्ट बॉलरनी इतिहास घडवला, दुसऱ्याच दिवशी झाला विक्रम!

जसप्रीत बुमराहच्या (Jasprit Bumrah) नेतृत्वात टीम इंडियाच्या फास्ट बॉलर्सची शानदार कामगिरी सुरूच आहे. दुसऱ्या दिवसाचा खेळ संपला तेव्हा इंग्लंडचा स्कोअर 84/5 एवढा झाला. बुमराहने 3 तर मोहम्मद शमी आणि मोहम्मद सिराज यांना प्रत्येकी 1-1 विकेट घेण्यात यश आलं.

इंग्लंडविरुद्धच्या 5 मॅचच्या सीरिजमध्ये भारतीय फास्ट बॉलरनी दुसऱ्या दिवसापर्यंत 66 विकेट घेतल्या आहेत. द्विपक्षीय टेस्ट सीरिजमध्ये टीम इंडियाच्या फास्ट बॉलर्सची ही सर्वोत्तम कामगिरी आहे. याआधी 2018 साली इंग्लंडमध्येच झालेल्या 5 टेस्ट मॅचच्या सीरिजमध्ये भारताने 61 विकेट घेतल्या होत्या.

इंग्लंडविरुद्धच्या या सीरिजमध्ये भारताच्या 6 फास्ट बॉलरनी कमीत कमी एक विकेट घेतली आहे. पाचव्या टेस्टमध्ये टीम इंडियाचं नेतृत्व करत असलेल्या बुमराहने सर्वाधिक 21 विकेट मिळवल्या आहेत. 64 रनवर 5 ही त्याची सर्वोत्तम कामगिरी आहे.

मोहम्मद सिराज 15 विकेटसह दुसऱ्या क्रमांकावर आहे. 29 च्या सरासरीने त्याने विकेट घेतल्या. 32 रन देऊन 4 विकेट ही त्याची सर्वोत्तम कामगिरी आहे. मोहम्मद शमीने 12 विकेट घेतल्या. 95 रनवर 4 विकेट त्याची सर्वोत्तम कामगिरी आहे.

शार्दुल ठाकूरने 7, उमेश यादवने 6 आणि इशांत शर्माने 5 विकेट घेतल्या, पण आता इशांत शर्माला टीममध्ये स्थान मिळालेलं नाही. तर उमेश यादव पाचवी टेस्ट खेळत नाहीये, त्याच्याऐवजी शार्दुल ठाकूरला प्लेयिंग इलेव्हनमध्ये संधी मिळाली आहे.

टीम इंडिया या सीरिजमध्ये 2-1 ने आघाडीवर आहे, त्यामुळे त्यांच्याकडे सीरिज जिंकण्याची चांगली संधी आहे. शेवटची मॅच जिंकली तर त्याचा टीमला वर्ल्ड टेस्ट चॅम्पियनशीपच्या पॉईंट्स टेबलमध्येही फायदा होईल. ही मॅच जिंकल्यास टीम इंडियाचे 60 टक्के पॉईंट्स होतील. ऑस्ट्रेलियाची टीम 78 टक्क्यांसह पहिल्या क्रमांकावर आहे.