IND vs ENG: 39 वर्षात मँचेस्टरमध्ये भारत इंग्लंडला नाही पराभूत करू शकला; सीरीज जिंकणार का?

कर्णधार म्हणून रोहित शर्माची कामगिरी चांगली झाली आहे. नवा कर्णधार झाल्यानंतर त्याच्या नेतृत्वाखाली भारताने आतापर्यंत एकही मालिका गमावलेली नाही आणि सलग 6 मालिकाही जिंकल्या आहेत. भारत आणि इंग्लंड (Ind vs Eng) यांच्यातील 3 एकदिवसीय सामन्यांच्या मालिकेतील तिसरा आणि अंतिम सामना उद्या खेळवला जाणार आहे. मालिका सध्या 1-1 अशी बरोबरीत आहे. (एएफपी)

टीम इंडियाने टी-20 मालिकेत इंग्लंडचा पराभव केला. त्यामुळे भारतीय संघाचा उत्साह वाढला आहे, पण हा सामना मँचेस्टरच्या ओल्ड ट्रॅफर्ड मैदानावर होणार आहे. येथे आतापर्यंत इंग्लिश संघाचा वरचष्मा राहिला आहे. या दोन्ही संघांमध्ये आतापर्यंत 4 वनडे सामने इथं झाले आहेत. यजमानांनी यापैकी 3 मध्ये विजय मिळवला आहे. भारतीय संघाने केवळ एकच सामना जिंकला आहे. (भारतीय क्रिकेट संघ इन्स्टाग्राम)

टीम इंडियाने 1983 मध्ये इथं इंग्लंडचा 6 विकेटने पराभव केला होता. विश्वचषकाची उपांत्य फेरी होती, त्यानंतर भारतीय संघ चॅम्पियनही झाला. या सामन्यात प्रथम खेळताना इंग्लंडने 213 धावा केल्या होत्या. प्रत्युत्तरात भारतीय संघाने 4 गडी गमावून हे लक्ष्य गाठलं. मोहिंदर अमरनाथने 2 विकेट घेण्याव्यतिरिक्त 46 धावा केल्या आणि त्याला सामनावीर म्हणून गौरवण्यात आलं होतं. (फोटो क्रेडिट्स - @icc)

यानंतर या मैदानावर दोन्ही संघ 3 वेळा आमनेसामने आले आहेत आणि प्रत्येक वेळी इंग्लंडने विजय मिळवला आहे. 1986 मध्ये खेळलेला सामना इंग्लिश संघाने 5 गडी राखून जिंकला होता. यानंतर 1996 मध्ये 4 गडी राखून आणि 2007 मध्ये 3 विकेटने विजय मिळवला होता. आता 15 वर्षांनंतर पुन्हा दोन्ही संघ इथं आमनेसामने आले आहेत. (एपी)

या मैदानावर लक्ष्याचा पाठलाग करताना संघाने चारही सामने जिंकले आहेत. उद्या नाणेफेक जिंकणारा संघ प्रथम गोलंदाजी करू शकतो. या मालिकेतील पहिला सामना भारतीय संघाने 10 गडी राखून जिंकला होता. पण दुसऱ्या सामन्यात इंग्लंडने शानदार पुनरागमन करत 100 धावांनी विजय मिळवला. (एपी)

जॉस बटलरला इंग्लंडच्या T20 आणि ODI संघाचा नवा कर्णधार बनवण्यात आलं आहे. इऑन मॉर्गन निवृत्त झाला आहे. पण कर्णधार म्हणून बटलरची सुरुवात चांगली झालेली नाही. टी-20 मालिकेत त्यांचा पराभव झाला होता. अशा स्थितीत वनडे मालिका जिंकून बटलर पुनरागमनाच्या प्रयत्नात असेल. (एएफपी)