World Cup : खेळाडूंची नाही तर प्रेक्षकांची भीती, दोन क्रिकेटपटूंना इंग्लंडमध्ये धोका?

इंग्लंडमध्ये 30 मे पासून सुरु होणाऱ्या वर्ल्ड कप स्पर्धेसाठी सर्वच खेळाडू मेहनत घेत आहेत. संघाला विजेतेपद मिळवून द्यायचं यासाठी प्रयत्न करत आहेत. मात्र, ऑस्ट्रेलियाचा माजी कर्णधार स्टीव्हन स्मिथ आणि सलामीवीर डेव्हिड वॉर्नर यांना वेगळीच चिंता लागून राहिली आहे. गोलंदाजांचा सामना हे दोन्ही खेळाडू सहज करतील पण इंग्लंडच्या चाहत्यानां सामोरं जाणं त्यांच्यासाठी कठीण आहे.

ऑस्ट्रेलियाच्या संघाला असं वाटत आहे की, इंग्लंडचे प्रेक्षक, चाहते डेव्हिड वॉर्नर आणि स्टीव्हन स्मिथला टार्गेट करतील. हे दोघेही गेल्या वर्षी दक्षिण आफ्रिकेत चेंडू कुरतडल्याप्रकरणी दोषी आढळले होते. त्यानंतर दोघांवरही एक वर्षांची बंदी घालण्यात आली होती. यावरुन दोघांना लक्ष्य केलं जाण्याची शक्यता ऑस्ट्रेलियन संघाला वाटते.

ऑस्ट्रेलियाचे माजी प्रशिक्षक डॅरेन लेहमन यांनी म्हटलं आहे की, आपण प्रेक्षकांवर नियंत्रण नाही ठेवू शकत. प्रेक्षकांमुळे वातावरण तणावपूर्ण होऊ शकतं पण त्यासाठी दोघेही तयार आहेत. दोघांनीही गेल्या वर्षभरात खूप सहन केलं आहे आणि यापुढेही ते तयार आहेत.

सध्या स्टीव्हन स्मिथ आणि वॉर्नर दोघेही फॉर्ममध्ये आहेत. आयपीएलमध्ये वॉर्नरने 12 सामन्यात सर्वाधिक 692 धावा काढल्या आहेत. तर स्टीव्हन स्मिथने वर्ल्ड कपच्या आधी न्यूझीलंड विरुद्ध जबरदस्त कामगिरी केली आहे. यात त्याच्या अर्धशतकी खेळीचा समावेश आहे.

ऑस्ट्रेलियाच्या संघाला वॉर्नर आणि स्मिथवर हल्ला होण्याची भीती वाटत असतानाच इंग्लंडचा अष्टपैलू खेळाडू मोइन अली त्यांच्या बाजूने उभा राहिला आहे. त्याने इंग्लंडच्या प्रेक्षकांना आवाहन केलं आहे की, डेव्हिड वॉर्नर आणि स्टीव्हन स्मिथवर खाजगी टीका करू नका.

ऑस्ट्रेलियात मोइन अलीची तुलना दहशतवाद्याशी करण्यात आली होती. 2015 मध्ये अॅशेस मालिकेवेळी त्याला ऑस्ट्रेलियन खेळाडूंनी ओसामा म्हटलं होतं. त्यावेळी मोइन अलीला राग आला होता.