IPL 2019 : ...म्हणून RCBचा पराभव, विराटबाबतची 'गंभीर'वाणी खरी ठरत आहे का?

इंडियन प्रीमियर लीगच्या 12 व्या हंगामाला सुरुवात होण्याआधी भारताचा माजी क्रिकेटपटू गौतम गंभीरने विराट कोहलीच्या नेतृत्वावर शंका उपस्थित केली होती. कर्णधार म्हणून त्याच्या कामगिरीवर गंभीरने खोचक टीका केली होती.

शनिवारी झालेल्या पहिल्या सामन्यात गंभीरने विराटवर केलेले काही आरोपात तथ्य असल्याचंच जाणवलं. चेन्नईविरुद्धच्या सामन्यात कोहलीच्या बेंगळुरु संघाला दारुण पराभव पत्करावा लागला.

पहिल्यांदा फलंदाजी करताना बेंगलोरचा संघ फक्त 70 धावा करु शकला. त्यांच्याकडचे विराट कोहली, डीव्हिलियर्स यांच्यासारखे दिग्गज फलंदाजही ढेपाळले. त्यामुळेच चेन्नईने 7 विकेटने सामना जिंकला.

कर्णधार म्हणून कोहलीला चेन्नईच्या मैदानाचा अंदाज घेता आला नाही. चेन्नईचे मैदान फिरकीला मदत करणारे असताना त्याने संघात 5 मध्यमगती गोलंदाजांना खेळवले.

बेंगळुरु संघात शिवम दुबे, नवदीप सैनी, उमेश यादव मोहम्मद सिराज हे गोलंदाज होते. तर चेन्नईकडे जडेजा, हरभजन सिंग, इम्रान ताहिर हे फिरकीपटू होते.

गौतम गंभीरने विराट कोहली हुशार कर्णधार नसल्याचे म्हटले होते. तसेच त्याच्याकडे सामन्याची रणनिती आखण्याचं कौशल्य नाही असंही त्याने म्हटलं होतं.