IND vs WI: राहुल द्रविड बदलणार रणनीती, 2 दमदार फिनिशर्सचा होणार टीममध्ये समावेश!

दक्षिण आफ्रिका विरुद्ध झालेल्या पराभवानंतर टीम इंडियाला आता नव्यानं रणनीती तयार करावी लागणार आहे. भारत विरुद्ध वेस्ट इंडिज (India vs West Indies) यांच्यात पुढच्या महिन्यात वन-डे आणि टी20 मालिका होणार आहे. या मालिकेत देशांतर्गत क्रिकेटमध्ये दमदार कामगिरी करणाऱ्या 2 फिनिशर्सच्या समावेशासाठी हेड कोच राहुल द्रविड (Rahaul Dravid) आग्रह करू शकतो.

तामिळनाडूचा क्रिकेटपटू शाहरूख खानला (Shahrukh Khan) टी20 टीममध्ये फिनिशरची भूमिका मिळू शकते. शाहरूख खाननं सय्यद मुश्ताक अली ट्रॉफीच्या फायनलमध्ये शेवटच्या बॉलवर सिक्स लगावत तामिळनाडूला विजतेपद मिळवून दिले होते. तो सध्या जबरदस्त फॉर्मात आहे.

शाहरूख खानला व्यंकटेश अय्यरच्या जागी टीममध्ये संधी मिळू शकते. शाहरूख मागील आयपीएल स्पर्धेत पंजाब किंग्जकडून खेळला होता.12 आणि 13 फेब्रुवारी रोजी होणाऱ्या ऑक्शनमध्ये (IPL 2022 Mega Auction) त्याच्यावर मोठी बोली लागण्याची शक्यता आहे.

हिमाचल प्रदेशला विजय हजारे स्पर्धेचं ऐतिहासिक विजेतेपद मिळवून देणाऱ्या ऋषी धवनचा (Rishi Dhawan) वन-डे टीममध्ये समावेश होऊ शकतो. ऋषीनं बॅटींग आणि बॉलिंग या दोन्ही विभागात विजय हजारे स्पर्धेत दमदार कामगिरी करत निवड समितीचं लक्ष वेधून घेतलं आहे. (फोटो -BCCI)

ऋषी धवननं 2016 साली ऑस्ट्रेलिया विरुद्ध आंतरराष्ट्रीय क्रिकेटमध्ये पदार्पण केले होते. त्याला 3 वन-डे आणि 1 टी20 इंटरनॅशनल खेळण्याचा अनुभव आहे. दोन्ही प्रकारात त्याने आजवर प्रत्येकी 1 विकेट घेतली आहे. विजय हजारे स्पर्धेत 17 विकेट्स आणि 458 रन करत त्यानं टीम इंडियातील जागेवर दावेदारी सादर केली आहे.