HBD Smriti Mandhana: भावाला पाहून सुरू केले क्रिकेट, 17 व्या वर्षीच रचला सर्वात मोठा इतिहास

टीम इंडियाची प्रमुख बॅटर स्मृती मंधानाचा (Smriti Mandhana) आज 25 वा वाढदिवस आहे. भाऊ आणि वडिलांना क्रिकेट खेळताना पाहून स्मृतीनं अगदी लहान वयातच बॅट हातामध्ये घेतली. तिची वयाच्या 9 व्या वर्षीच महाराष्ट्राच्या अंडर 15 टीममध्ये निवड झाली होती. (Smriti Mandhana Instagram)

स्मृती मंधानानं ऑक्टोबर 2013 मध्ये अंडर-19 वेस्ट झोन क्रिकेटमध्ये 150 बॉलमध्ये नाबाद 224 रन काढले होते. वन-डे क्रिकेटच्या प्रकारात द्विशतक करणारी ती पहिली भारतीय महिला क्रिकेटपटू होती. स्मृतीने वयाच्या 17 व्या वर्षीच हा सर्वात मोठा इतिहास रचला.

स्मृतीनं 2013 साली आंतरराष्ट्रीय क्रिकेटमध्ये पदार्पण केले. तिने यामध्ये अगदी कमी कालावधीमध्ये ठसा उमटवला. 2016 साली आयसीसीच्या महिला टीममध्ये निवड झालेली ती एकमेव भारतीय होती. 2018 साली तिला ‘बेस्ट महिला क्रिकेटर ऑफ द इयर’ हा पुरस्कार मिळाला होता. (Smriti Mandhana Instagram)

स्मृती मंधाना 2017 वन-डे वर्ल्ड कप आणि 2020 मध्ये झालेल्या टी20 वर्ल्ड कपच्या टीम इंडियाची सदस्य आहे. या दोन्ही स्पर्धेतील टीम इंडियाच्या फायनलपर्यंतच्या प्रवासात स्मृतीचे मोलाचे योगदान आहे. ती ऑस्ट्रेलियातील टी20 लीग बिग बॅश लीगमध्ये खेळली आहे. तसेच इंग्लंडमध्ये होणाऱ्या ‘द हंड्रेड’ या लीगसाठी देखील तिची निवड झाली आहे. (Smriti Mandhana Instagram)

स्मृती मंधानानं 59 वन-डेमध्ये 42 च्या सरासरीनं 2253 रन काढले आहेत. यामध्ये 4 शतक आणि 18 अर्धशतकांचा समावेश आहे. वन-डे क्रिकेटमध्ये भारताकडून सर्वात जास्त रन काढणाऱ्या टॉप पाच जणींमध्ये तिचा समावेश आहे. स्मृतीनं टी20 क्रिकेटमध्ये 81 मॅचमध्ये 26 च्या सरासरीनं 1901 रन काढले आहेत. यामध्ये 13 अर्धशतकांचा समावेश आहे. या प्रकारात भारताकडून सर्वाधिक रन करण्याच्या यादीमध्ये ती तिसऱ्या क्रमांकावर आहे. तिने 3 टेस्टमध्ये 2 अर्धशतकं झळकावली आहेत. (Smriti Mandhana Instagram)