गेलच्या वादळात इंग्लंडची धूळधाण, केला 'हा' विक्रम

सध्या फॉर्ममध्ये असलेल्या वेस्ट इंडीजचा स्फोटक फलंदाज ख्रिस गेलने आणखी एक वादळी खेळी केली आहे. इंग्लंडविरुद्ध पाच एकदिवसीय सामन्यांच्या मालिकेतील शेवटच्या सामन्यात गेलने 27 चेंडूत 77 धावा केल्या.

इंग्लंडने प्रथम फलंदाजी करताना 113 धावा केल्या. प्रत्युत्तरादाखल खेळताना वेस्ट इंडिजने हे आव्हान अवघ्या 12.1 षटकांत पूर्ण केले.

ख्रिस गेलने केलेल्या खेळीच्या जोरावरच हा सामना विंडिजने जिंकला. गेलने 27 चेंडूत 5 चौकार आणि 7 षटकारांच्या सहाय्याने 77 धावा केल्या.

गेलने त्याच्या खेळीत फक्त 19 चेंडूत तीन चौकार आणि सहा षटकारांच्या सहाय्याने अर्धशतक केले. विंडीजकडून हे सर्वात वेगवान अर्धशतक आहे.

याआधीचा विक्रम डॅरेन सॅमीच्या नावावर होता. त्याने 2010 आणि 2012 मध्ये अनुक्रमे दक्षिण आफ्रिका आणि ऑस्ट्रेलियाविरुद्ध 20 चेंडूत अर्धशतक केले होते.

ख्रिस गेलने या मालिकेत पाच सामन्यातील चार डावात 424 धावा केल्या. त्याला मालिकावीरचा पुरस्कार देण्यात आला. गेलने विश्वचषकानंतर क्रिकेटमधून निवृत्त होणार असल्याची घोषणा केली आहे.