टीम इंडियाच्या नव्या युगाची सुरुवात, बीसीसीआय धोनीला म्हणाली...

एमएस धोनी (MS Dhoni)ने आयपीएल (IPL 2020)चा 13 वा मोसम सुरू व्हायच्या आधी एक महिना आंतरराष्ट्रीय क्रिकेटमधून निवृत्ती घेतली. 15 ऑगस्टला धोनीने आपण निवृत्त होत असल्याची घोषणा केली. 2019 साली वर्ल्ड कपनंतर धोनी क्रिकेटपासून लांब होता, यानंतर त्याने आंतरराष्ट्रीय क्रिकेमधून संन्यास घ्यायचा निर्णय घेतला.

धोनीच्या निवृत्तीनंतर टीम इंडिया पुढच्या महिन्यात आपली पहिली सीरिज खेळणार आहे. सोमवारी ऑस्ट्रेलिया दौऱ्यासाठी निवड समितीने 32 खेळाडूंची निवड केली. टीम इंडियाच्या घोषणेनंतर बीसीसीआयने धोनीला सलाम केला.

धोनी सध्या युएईमध्ये आयपीएल खेळत आहे. आयपीएल संपल्यानंतर टीम इंडिया तिकडूनच ऑस्ट्रेलियाला रवाना होणार आहे. धोनीशिवाय टीम इंडिया एका नव्या युगाला सुरुवात करत आहे. त्याआधी बीसीसीआयने धोनीचा सन्मान म्हणून आपल्या ट्विटर अकाऊंटचा कव्हर फोटो बदलला.

बीसीसीआयच्या या कव्हर फोटोवर धोनीला स्थान दिलं आहे. सोबतच #ThankYouMSDhoni हा हॅशटॅगही वापरला आहे.

धोनी आणि त्याच्या चेन्नईच्या टीमसाठी आयपीएलचा यंदाचा मोसम निराशाजनक ठरला आहे. चेन्नईची टीम पहिल्यांदाच आयपीएलच्या प्ले-ऑफमध्ये खेळणार नाही. तसंच आयपीएल प्ले-ऑफच्या शर्यतीमधून चेन्नई ही पहिलीच बाहेर झालेली टीम आहे.