पुण्यात पत्नीचा आंघोळ करतानाचा लपून VIDEO करीत होता तरुण; पोलिसात स्वत:च जाऊन केली तक्रार

पुण्यात स्वत:च्या पत्नीचा आंघोळ करताना व्हिडीओ करण्याच्या आरोपाखाली एका व्यक्तीला अटक करण्यात आली आहे. हैराण करणारी बाब म्हणजे 40 वर्षांच्या या व्यक्तीनी स्वत: देहू रोड पोलीस स्टेशनमध्ये जाऊन याबाबत तक्रार दाखल केली होती. या तक्रारीत त्याने पत्नी खूप त्रास देत असल्याचं सांगितलं होतं.

देहू रोड पोलीस स्टेशनमध्ये दोन्ही पती-पत्नींना चौकशीसाठी बोलावलं. महिला सेलच्या पोलीस इन्स्पेक्टर कुंदा गावडे यांनी पत्नीला जेव्हा तक्रारीबाबत विचारलं तेव्हा सर्व प्रकार समोर आला.

पत्नीने दिलेल्या माहितीनुसार, पती तिलाच त्रास देत होता. चारित्र्याबाबत शंका घेतो, पत्नीने पुढे सांगितलं की, प्लंबिंगचं काम माहिती असतानाही पती घरातील जबाबदारी घेत नाही. गेल्या दीड वर्षांपासून तो काहीच काम करीत नाही. अनेकदा तर मारहाण केल्याचंही पत्नीने सांगितलं.

पत्नीचं म्हणणं ऐकल्यानंतर पोलीस अधिकाऱ्याने तपास करण्यासाठी पतीचा मोबाइल घेतला. मोबाइलच्या गॅलरीत पतीने पत्नीचे अश्लिल व्हिडीओ स्टोअर करून ठेवले होते. याबद्दल विचारल्यानंतर आरोपीने आपल्या गुन्ह्याची कबुली दिली आहे. 21 मे रोजी जेव्हा पत्नी आंघोळीसाठी बाथरुममध्ये गेली, तेव्हा आरोपी पतीने लपून तिचा व्हिडीओ शूट केला. हे ऐकल्यानंतर पत्नीला धक्काच बसला.

आरोपी देहू, पिंपरी-चिंचवड, भोसरी या भागात प्लंबिंगचं काम करतो. तर त्याची पत्नी घरकाम करते आणि मासे विकून घर चालवते. पोलिसांनी दिलेल्या माहितीनुसार या दाम्पत्याला 14 आणि 8 वर्षांच्या मुली आहेत.