PHOTOS: पुण्यात सलग दुसऱ्या वीकेंड लॉकडाऊनचं काटेकोर पालन; गजबजणारे रस्ते पडले ओस

चंद्रकांत फुंदे, पुणे: सध्या संपूर्ण महाराष्ट्रात वीकेंड लॉकडाऊनची घोषणा करण्यात आली आहे. त्यामुळे शुक्रवारी सायंकाळी सुरू झालेलं हे लॉकडाऊन उद्या सोमवार सकाळपर्यंत सुरू असणार आहे. गेली दोन दिवसांपासून पुण्यातील नागरिकांनी याला उत्स्फूर्त प्रतिसाद दिला असून वीकेंड लॉकडाऊनचं काटेकोर पालन केलं आहे.

सलग दुसऱ्या दिवशी पुणेकरांनी वीकेंड लॉकडाऊनचं अतिशय कडक पालन केलं आहे. आज रविवार असूनही कोरोनाच्या भीतीने अनेक नागरिक साधं मॉर्निग वॉकलाही घराबाहेर पडले नाहीत.

पुण्यातील स्वारगेट चौक, महात्मा फुले मंडई अशा गजबजलेल्या ठिकाणीही स्मशान शांतता अनुभवायला मिळत आहे.

क्वचितच एखादी गाडी रस्त्यावरून धावताना दिसत आहे. त्यामुळे एरवी नागरीकांच्या घोंगाटाने गजबजलेले परिसर गेल्या दोन दिवसांपासून ओस पडले आहेत.

पुण्यातील पेठा, तुळशी बाग आणि महात्मा फुले भाजी मंडईत दर रविवारी पुणेकरांची अफाट गर्दी असते. पण आज रविवार असूनही लॉकडाऊनमुळे सर्व ठिकाणी चडीचूप आहे.

खरंतर, देशातील सर्वाधिक कोरोना रुग्ण पुण्यात आढळत आहेत. त्यामुळे पुणेकरांच्या चिंता वाढताना दिसत होत्या, मात्र वीकेंड लॉकडाऊनला पुणेकरांचा उत्स्फूर्त प्रतिसाद पाहाता कोरोना प्रसाराला काही प्रमाणात खिळ बसू शकते.