Pune Metro पुन्हा एकदा वर्षभराने दिसली! कामाचा महत्त्वपूर्ण टप्पा पार पाहा PHOTOS

पुणे मेट्रोच्या कामाने वेग घेतला असून आतापर्यंत 45 % काम पूर्ण झालं आहे. PCMC ते स्वारगेट व वनाझ ते रामवाडी या दोन मार्गिकांमध्ये व्हायाडक्ट , स्टेशन आणि भूमिगत मार्गांची कामे प्रगतीपथावर चालू आहेत.

वनाज व रेंज हिल्स येथील डेपो उभारण्याचे काम देखील प्रगतीपथावर आहे. यापूर्वी 10 जानेवारी 2020 रोजी पीसीएमसी ते संत तुकारामनगर या 1 किमी मार्गावर पहिली चाचणी घेण्यात आली होती. बरोबर एक वर्षांनी आज ही दुसरी चाचणी घेण्यात आली आहे.

आज 03 जानेवारी 2021 रोजी पीसीएमसी ते फुगेवाडी अशा साधारणतः 6 किमी मार्गावर ही मेट्रो ट्रेन धावली. कोरोनामुळं गेल्या 6 ते 7 महिन्यांत कामाची गती कमी झाली होती. तरीदेखील पुणे मेट्रोनं हा महत्त्वपूर्ण टप्पा पार केला आहे.

दुपारी दीड वाजता मेट्रो ट्रेन PCMC स्थानकावरून सुटली आणि दुपारी दोन वाजता ही ट्रेन फुगेवाडी या स्थानकावर पोहोचली.

या चाचणीसाठी ओएचई (OHE) तारा 25 किलो वॅट विद्युत भाराने प्रभावित केल्या होत्या. विद्युत तारांची क्षमता आणि 6 किमीचा रेल्वे ट्रॅक तपासण्यासाठी ही चाचणी घेण्यात आली होती.

सुरक्षेतेच्या दृष्टीकोनात सर्व बाबींची पूर्तता करून आजची ही चाचणी यशस्वीरीत्या पार पडली. पुणे मेट्रोचे काम वेळेत पूर्ण करण्यासाठी हा एक महत्त्वाचा टप्पा आहे. या चाचणीसाठी 3 कोच लांबीची मेट्रो ट्रेन वापरण्यात आली होती. महामेट्रोचे तांत्रिक कुशल कामगार या चाचणीसाठी गेल्या अनेक दिवसांपासून काम करत होते.