महामार्गात ठरतेय अडथळा, पुण्यात इमारत सरकवण्यात येतेय 9 फूट मागे

संत तुकाराम महाराज पालखी महामार्गाच्या मधी आड येणारी इमारतच चक्क स्थलांतरित करण्याचा प्रयत्न बारामती तालुक्यातील मासाळवाडी या गावात एक नवीनच प्रयोग सुरू आहे, तसा तो प्रयोग इतरत्र वापरला जातो, मात्र या भागात नवीनच असल्याने त्याचे कुतूहल अधिक आहे. 

काटेवाडीतील अकबर दादासाहेब मुलाणी यांची ३ हजार फूट दुमजली इमारत चक्क ९ फूट मागे सारली जाणार आहे. त्याचे काम महिन्यापासून सुरू आहे, आता हे काम पूर्णत्वास आले असून येत्या दोन दिवसांत ही इमारत पाच फूट उंच उचलून ९ फूट मागे घेतली जाणार आहे.

यासाठी हरियाणातून खास प्रशिक्षित ठेकेदाराला आणण्यात आलेय या ठेकेदाराने आतापर्यंत उत्तर प्रदेश, हरियाणा, दिल्ली आदी राज्यांमधील १ हजारहून अधिक इमारती मागे घेतल्या आहेत.  अथवा इतरत्र नेल्या आहेत. ज्या आडव्या इमारती होत्या, त्या सरळ करून दिल्या आहेत.

काटेवाडीतील मासाळवाडीत हा प्रयोग सुरू आहे. मुलाणी यांनी सांगितले की, इमारत रस्त्याच्या अगदी कडेला येत होती. पाठीमागे जागा शिल्लक होती. ही इमारत पाडायला देखील मोठा खर्च येत होता. नव्याने इमारत उभी करायची झाल्यास ५० लाख रुपये खर्च आला असता. त्यांनी युट्यूबवर सर्च केले आणि हरियाणातील या लोकांचा शोध घेतला.

इमारत पाठीमागे घेण्याकरिता १० लाख रुपये खर्च सांगितला आहे. इमारत पाडण्यापेक्षा ती मागे घेऊन त्याचा पुनर्वापर करता येणे शक्य असल्याने हा पर्याय निवडला. योगायोगाने पाठीमागे दहा फूट जागा शिल्लक असल्याने हे शक्य झाले असे मुलाणी यांनी सांगितले.