गुजरात महानगरपालिका निवडणुकीतील पराभवानं काँग्रेस भडकलं; पक्षाच्या कार्यालयात तोडफोड, पाहा PHOTO

सूरत महानगरपालिका निवडणुकीत भाजपनं दमदार यश मिळवलं आहे. एकूण 120 जागांपैकी 93 जागांवर भाजपनं आपला झेंडा फडकवला आहे. तर, काँग्रेसला लज्जास्पद पराभवाला सामोरं जावं लागलं आहे. आम आदमी पार्टीनंही 27 जागांवर यश मिळवल्यानं एकच आश्चर्य व्यक्त होत आहे. मात्र, निकाल समोर आल्यानंतर निराश झालेल्या काँग्रेस कार्यकर्त्यांनी जोरदार विरोध प्रदर्शन केलं आहे. त्यांना कार्यालयाबाहेक जिल्हा आणि शहर अध्यक्षांचे पुतळे जाळले आहेत.

काँग्रेस कार्यकर्त्यांनी पेट्रोल टाकून बाबू रायका, कादिर पीरजादा आणि तुषार चौधरी यांचे पुतळे जाळले आणि आरोप केला, की या लोकांनी काँग्रेसला विकलं आहे. कार्यकर्त्यांनी या नेत्यांचे फोटोही फाडून टाकले आहेत. एकीकडे काँग्रेसला मोठा धक्का बसला असतानाच या निवडणुकीत आपचा मात्र गृहप्रवेश झाला आहे.

सूरतमध्ये आपनं मिळवलेल्या या विजयामुळे दिल्लीचे मुख्यमंत्री अरविंद केजरीवाल यांचा उत्साहही वाढला आहे. केजरीवाल 26 तारखेला सकाळी सुरतमध्ये रोड शो करणार आहेत. या निवडणुकीत भाजपनं 93 जागांवर विजय मिळवला आहे. तर, आपनं 27 जागांवर विजय मिळवला आहे.

2015च्या निवडणुकांमध्ये अहमदाबाद, राजकोट, जामनगर, भावनगर, वडोदरा आणि सूरत या सर्व महानगरपालिकांमध्ये भाजपचं सरकार आलं. या निवडणुकांमध्ये दोन जागा बिनविरोध होत्या. यात वडोदरा आणि सूरतमधील एका एका जागेचा समावेश आहे.

सूरतमध्ये काँग्रेसला मोठ्या पराभवाचा सामना करावा लागला आहे. बाबू रायका यांनी या पराभवाची जबाबदारी स्वीकारत पक्षाच्या अध्यक्षपदाचा राजीनामा दिला आहे. मागील वेळी 36 जागा जिंकणाऱ्या काँग्रेसला यावेळी एकाही जागेवर विजय मिळवता आलेला नाही.