बापरे! एकाच झाडाला टोमॅटो, बटाटा अन् वांगी, पाहा फोटो

तुम्हाला जर असं विचारलं गेलं, की वांगयाच्या झाडाला काय येईल? किंवा टोमॅटोच्या झाडाला काय येईल? तर निश्चितच तुमचं उत्तर असेल, की वांग्याच्या झाडाला वांगं आणि टोमॅटोच्या झाडाला टोमॅटो. मात्र, वाराणसीतील भारतीय भाजीपाल संशोधन संस्थेनं संशोधन करुन अशी झाडं तयार केली आहेत, ज्यात एकाच झाडाला विविध प्रकारच्या फळभाज्या येतात.

एकाच रोपट्याला तीन वेगवेगळ्या प्रकारच्या फळभाज्या लागलेल्या तुम्हाला या फोटोमध्ये पाहायला मिळेल. ही गोष्ट नक्कीच विश्वास बसण्यासारखी नाही. मात्र, हा फोटो पाहून तुम्ही नक्कीच आश्चर्यचकीत व्हाल. या फोटोमध्ये आपण पाहात असाल, की वांगी आणि टोमॅटो एकाच रोपाला आले आहेत आणि तेही भरपूर प्रमाणात.

इतकंच नाही, पुढचा फोटो पाहा. यात एकाच झाडाला 2 भाज्या आल्या आहेत. जमीनीच्या आतमध्ये बटाटे आणि वरती टोमॅटो आल्याचं आपल्याला पाहायला मिळेल. या झाडाला पोमैंटो असं नाव दिलं गेलं आहे. ग्राफ्टिंगचा वापर करुन हे केलं गेलं आहे.

संस्थानाचे डायरेक्टर डॉ. जगदीश सिंह यांच्या देखरेखित वैज्ञानिक डॉ. अनंत बहादूर सिंह आणि त्यांच्या टीमनं विज्ञानाच्या मदतीनं हे करुन दाखवलं आहे. एका झाडाला जवळपास 3 किलोहून जास्त वांगी आणि 2 किलो टोमॅटो येतात. वांगं आणि टोमॅटोचं कलम करुन हे झाडं लावलं गेलं आहे.

संस्थानानं पहिल्यांदा बटाट्यासोबत टोमॅटो आणि आता वांग्यासोबत टोमॅटोचा प्रयोग यशस्वी केला आहे. आता पुढील टप्प्यात एकाच झाडावर बटाटे, टोमॅटो आणि वांगी किंवा टोमॅटो, वांगी आणि मिरची घेण्याच्या प्रयोगासाठी शोध सुरु आहे.

हा शोध करत असलेल्या संस्थानाचे वैज्ञानिक डॉ. अनंत बहादूर म्हणाले, की ही विशेष रोपं तयार करण्यासाठी 24 ते 28 डिग्री तापमानात 85 टक्क्याहून अधिक आर्द्रता आणि प्रकाश नसलेल्या नर्सरीत ठेऊन तयार केलं जातं.

कलम केल्यावर 15 ते 20 दिवसानंतर याला शेतामध्ये लावलं जातं. प्रमाणात पाणी आणि छाटणी केल्यानंतर 60 ते 70 दिवसांत या झाडांना फळे येऊ लागतात.

संस्थानाचे डायरेक्टर डॉ. जगदीश सिंह यांनी सांगितलं, की कलमाचा हा प्रयोग 2013-14मध्ये सुरू झाला. याचा सर्वाधिक फायदा शेतकऱ्यांना होईल. विशेषतः अशा शेतकऱ्यांना ज्यांच्याकडे पावसाळ्यानंतर मोठ्या प्रमाणात पाणी उपलब्ध असतं. सध्या या झाडांना शहरातील लोकांसाठी तयार केलं गेलं आहे. ज्यांच्याकडे जागा कमी आहे , मात्र औषध मारलेल्या भाज्यांपासून वाचण्यासाठी जे घरीच रोपं लावतात. तसंच टेरेस गार्डनची हौस असणाऱ्या लोकांसाठी ही झाडं आहेत. लवकरच शहरातील नर्सरीमध्ये ट्रेनिंग देऊन ही झाडं उपलब्ध करुन दिली जाणार असल्याची माहितीही त्यांनी दिली.