प्रेग्नन्सीमध्ये खाज, पुरळ; योग्य काळजी घेतल्यास टाळता येतील त्वचेच्या समस्या

आई होण्याची चाहूल लागणं हा प्रत्येक महिलेच्या आयुष्यातील अनमोल असा क्षण असतो. मात्र यादरम्यान महिलांच्या शरीरात अनेक बदल होत असतात. त्याच्या परिणाम त्यांच्या त्वचेवरही होतो.

बहुतेक स्त्रियांना डोळ्याभोवती काळी वर्तुळे, पिग्मेंटेशन, त्वचेवर चट्टे पडणे, मुरुम उठणे, व्हेरीकोज व्हेन्स, अशुद्ध रक्तवाहिन्या फुगून झालेल्या गाठी, भेगा पडलेल्या टाचा, ओठ फाटणं अशा अनेक समस्या उद्भवतात.

काही स्त्रियांना ओटीपोटात आणि मांडी तसंच त्याच्या आसपास त्वचेवर खाज सुटते किंवा लाल रंगाचे पुरळ उठू शकतात.

गर्भारपणात महिलांनी स्वतःच्या त्वचेची काळजी घेतल्यास या समस्या टाळता येऊ शकतात. यासाठी त्वचारोग तज्ज्ञांचा सल्ला घेणं गरजेचं आहे.

प्रेग्नन्सीत त्वचेची काळजी कशी घ्यावी, याबाबत द एस्थेटिक क्लिनिक्सच्या त्वचारोग सल्लागार आणि कॉस्मेटिक त्वचारोग तज्ज्ञ डॉ. रिंकी कपूर यांनी सल्ला दिला आहे.

घराबाहेर पडताना प्रत्येक वेळी सनस्क्रीनचा वापर करा तसंच उन्हापासून संरक्षण करण्यासाठी छत्री तसंच टोपीचा वापर करावा.

सॅलिसिलिक अॅसिड किंवा रेटिनोइड, आयसोट्रेटीनोईन आणि ओरल टेट्रासाइक्लिन असलेली उत्पादनं वापरू नका कारण यामुळे बाळामध्ये जन्मदोष उद्भवू शकतात.

मुरुमांवर उपचार करण्यासाठी टॉपिकल बेन्झॉयल पेरॉक्साईड, अझेलिक अॅसिड आणि ग्लाइकोलिक अॅसिड असलेली ओटीसी उत्पादनं वापरू शकता. मात्र त्याआधीही त्वचारोग तज्ज्ञांचा सल्ला घ्या.

मेकअप आणि त्वचेकरिता वापरली जाणारी उत्पादनं सुंगंध विरहित असणं गरजेचं आहे.

झोपायच्या आधी दररोज न चुकता आपला मेकअप काढणं आवश्यक आहे.

दिवसातून दोनदा कोमट पाण्याने आपला चेहरा धुवा, त्वचेला मॉईश्चराईज करा

जास्त जोरात आपली त्वचा घासू नका.

अंग पुसण्यासाठी स्वच्छ आणि मुलायम कपडा वापरा.

शक्य तितका आराम करा आणि ताण घेऊ नका.