पावसाळा आला म्हणून सोडू नका उन्हाळ्यातील या सवयी; नाहीतर त्वचेवर होईल दुष्परिणाम

पावसाळ्याला सुरुवात झाली असून या दिवसांमध्ये विविध प्रकारचे त्वचाविकार डोकं वर काढतात. या त्वचाविकारांना दूर ठेवण्यासाठी विशेष काळजी घेणे गरजेचे असते. याकरिता आपण कोणती काळजी घ्यावी याबाबत मुंबईत द एस्थेटिक क्लिनिक्सच्या सल्लागार डर्मेटोलॉजिस्ट, कॉस्मेटिक डर्मेटोलॉजिस्ट आणि डर्मेटो सर्जन डॉ रिंकी कपूर यांनी मार्गदर्शन केलं आहे.

पावसाळ्याच्या दिवसात डोक्यावरील केस आणि त्वचा अत्यंत नाजूक बनते. भिजून आल्यावर आपली त्वचा आणि डोके कोरडे न केल्यास बुरशीच्या वाढीला प्रोत्साहन मिळते. त्यामुळे त्वचा आणि केस कोरडे ठेवा.

भरपूर पाणी प्या – पावसाळ्यात तहान लागत नाही म्हणून पाणी कमी पिऊ नका. शरीराला आणि त्वचेला पाण्याची आवश्यकता असते ती भरून काढा.

सनस्क्रीनचा वापर करा - उन्हाळ्याप्रमाणे  पावसाळ्यातही आपण घराबाहेर पडताना प्रत्येक वेळी सनस्क्रीनचा वापर करावा. सूर्याच्या अतिनील किरणांपासून त्वचेचे संरक्षण करण्यासाठी त्वचेला सुरकुत्या तसेच टॅन होण्यापासून रोखण्यासाठी सनस्क्रीनचा वापर करणे गरजेचे आहे. 

अँटी-फंगल पावडरचा वापर करा - पावसाळ्यात शरीराची प्रतिकारशक्ती कमी होते आणि त्वचेवर बुरशीजन्य संसर्ग होण्याची शक्यता असते. आपल्या त्वचेवर आणि आपल्या पायाच्या बोटांच्या दरम्यान आणि स्तनाच्या खाली एक चांगली अँटी-फंगल पावडरचा वापर करून तुम्ही बुरशीजन्य वाढ रोखू शकता.

अंघोळीसाठी गरम पाण्याचा वापर टाळा – त्वचेला कोरडेपणापासून रोखण्यासाठी अतिशय गरम पाण्याचा वापर न करता कोमट अथवा थंड पाण्याने अंघोळ करणे योग्य राहील.

चेहऱ्याची स्वच्छता राखा – फेसवॉशचा वापर करा कारण त्याने तुमची त्वचा ताजीतवानी होते. हे घटक मळ काढून टाकतात आणि चेहऱ्यावरील छिद्रे मोकळी करतात. कोणत्याही साबणाने तुमचा चेहरा धुणे शक्यतो टाळावे. त्याचप्रमाणे जास्त खसखसून चेहरा धुवू नका.

रात्रीच्या वेळी चेहरा स्वच्छ करून मगच झोपा – रात्री झोपण्यापूर्वी मेकअप काढायला विसरू नका. त्वचा स्वच्छ पाण्याने धुवून मगच झोपा. यासाठी क्लिंजर्सचा वापर करा.