प्रतीक्षा संपणार! ऑगस्टमध्येच येणार कोरोना लस; रशियाने दिली आनंदाची बातमी

जगभरात सध्या शेकडो कोरोना लशी तयार करण्यात आल्या आहेत. त्यापैकी काही लशींची प्राण्यांवरील चाचणी यशस्वी ठरली आहे. तर काही लशी ह्युमन ट्रायलच्या टप्प्यात आहेत.

ह्युमन ट्रायलच्या टप्प्यात असलेल्या लशींपैकी एक लस रशियाचीदेखील आहे आणि ही लस ऑगस्टमध्येच बाजारात उपलब्ध होईल, असा दावा रशियाने केला आहे.

दोन आठवड्यांपेक्षाही कमी कालावधीत रशिया आपल्या कोरोना लशीला परवानगी देऊ शकतं, असं वृत्त सीएनएनने दिलं आहे. 

मॉस्कोतील गमलेया इन्स्टिट्युटने ही कोरोना लस विकसित केली आहे. रशियाच्या अधिकाऱ्यांनी सीएनएनलाला दिलेल्या माहितीनुसार 10 ऑगस्टपर्यंत रशिया कोरोना लशीला परवानगी देऊ शकतो.

सर्वसामान्य नागरिकांसाठी उपलब्ध करून देण्यात येणारी ही लस सर्वात आधी आरोग्य कर्मचाऱ्यांना दिली जाणार आहे.

रशियाने ही लस विकसित केली असली तरी त्याच्या चाचणीचा कोणताही वैद्यकीय अहवाल रशियाने प्रसिद्ध केलेला नाही. त्यामुळे ही लस किती सुरक्षित आणि परिणामकारक असेल हे सांगू शकत नाही, असं तज्ज्ञांनी सांगितलं आहे.