क्रिकेट विश्वातून धक्कादायक बातमी; खेळाडूच्या फोनमध्ये आढळले लहान मुलांचे अश्लील फोटो आणि व्हिडिओ, अटक

नवी दिल्ली 18 मे : ऑस्ट्रेलियन क्रिकेट संघ पुन्हा एकदा वाईट कारणामुळे चर्चेत आला आहे. एका ऑस्ट्रेलियन क्रिकेटपटूवर लहान मुलांवर लैंगिक अत्याचार (Aaron Summers Child Sexual Offence) केल्याचा गंभीर आरोप आहे. ऑस्ट्रेलियन संघाचा वेगवान गोलंदाज अ‍ॅरॉन समर्स याला शुक्रवारी पोलिसांनी अटक केली आणि सोमवारी त्याला डार्विन कोर्टात हजर करण्यात आले.

समर्स अलीकडेच अबू धाबी टी 10 लीगमध्ये डेक्कन ग्लॅडिएटर्सकडून खेळला होता. अ‍ॅरोन समर्सला फॅनी बे परिसरातून अटक केली गेली आणि त्याचा फोन जप्त करण्यात आला. समर्सच्या फोनमध्ये लहान मुलांवरील लैंगिक अत्याचाराचे व्हिडिओ आणि छायाचित्रे सापडल्याचा आरोप आहे.

अ‍ॅरॉन समर्सवर या गंभीर आरोपानंतर कोर्टाने त्यांना पोलीस कोठडी सुनावली. या प्रकरणाचा तपास करणारे अधिकारी म्हणाले, की मुलांना निर्भिडपणे जगण्याचा हक्क आहे, त्यांना अशा घाणेरड्या लोकांची भीती नाही वाटली पाहिजे.

अ‍ॅरॉन समर्स बिग बॅश लीगमध्ये होबार्ट हरीकेंसकडून खेळला आहे. याव्यतिरिक्त, तो तस्मानियासाठी वन डे कपही खेळला आहे. तसेच पाकमधील स्थानिक क्रिकेटमध्ये खेळणारा तो पहिला ऑस्ट्रेलियन खेळाडू ठरला होता.