कबिऱ्या गेला..,शेतकऱ्याने उभारली बैलाची समाधी, प्रेम पाहून लोकांनाही अश्रू अनावर!

शेतकऱ्याचा जीवाभावाचा खरा मित्र म्हणजे शेतीत काबाडकष्ट करणारा बैल. मावळ तालुक्यातील अशाच एका मायाळू बैलाने वयाची तब्बल 18 वर्ष इमानेइतबारे प्रपंचाचा गाडा ओढत शेतकऱ्याला साथ दिली दहा दिवसांपूर्वी आजारपणामुळे या कबिऱ्या नावाच्या बैलाचा दुर्देवी अंत झाला.

मावळ तालुक्यातील धामणे गावात राहणाऱ्या ज्ञानेश्वर गराडे यांच्या कुटुंबीयांनी 18 वर्षांपूर्वी सहा महिन्याचा बैल सांभाळण्यासाठी आणला घरची जेमतेम परिस्थिती मोठं कुटुंब, परंतु, जनावरांचे आवड असणाऱ्या गराडे यांनी पोटच्या मुलाप्रमाणे बैलाचा सांभाळ केला. प्रेमाने त्याचे नाव कबीऱ्या ठेवले. जसजसे दिवस सरत गेले तस तसा कधी शेताच्या नांगरणी ला तर कधी मालकाची पत राखण्याकरता कबीऱ्या गाव जत्रेत होणाऱ्या बैलगाडा शर्यतीत घाटात जीव तोडून धाऊ लागला.

मावळ ,मुळशी, खेड या तालुक्यात होणाऱ्या बैलगाडा शर्यतीत अगदी कमी वेळात धावण्याचे कबीऱ्याने अनेक विक्रम केले. त्यामुळे पंचक्रोशीत ज्ञानेश्वर गराडे यांच्या नावापुढे प्रसिद्ध गाडामालक हे विश्लेषण लागले. तालुक्यात होणाऱ्या प्रत्येक बैलगाडा शर्यतीत घाटाचा राजा तसेच फायनल सम्राट म्हणून कबिऱ्याने फ्रिज ,टीव्ही, दुचाकी सारखी अनेक बक्षिसे मिळविली

पाच वर्षांपूर्वी प्राणिमित्र संघटनेने बैलगाडा शर्यतीवर बंदी आणली त्यानंतर बैलांच्या रुबाबाला उतरती कळा लागली घाटात वाऱ्याच्या वेगाहुन अधिक गतीने धावणारा कबीऱ्या खुंटीला बांधू जाऊ लागला. धावण्याच्या सरावा अभावी त्याला अनेक आजारांनी ग्रासले. परंतु, गाडा मालकाने त्याच्या इलाजात कुठलेही कसर ठेवली नाही. दर्जेदार उपचार करूनही शेवटी कबीऱ्याने मालकाची साथ सोडली.

घरातील एखादा करता व्यक्ती दगावलेचे दुःख गराडे कुटुंबीयांना झालं. बैलाच्या ऋणातून मुक्त होण्यासाठी गराडे कुटुंबीयांनी त्याच्यावर विधीवत अंत्यसंस्कार करून आयुष्यभर कबिऱ्याची आठवण राहावी म्हणून समाधी ही बांधली.

तसंच तालुक्यातील प्रत्येक गाडामालकाला निमंत्रित करून दशक्रिया विधी पार पाडला. अनेक गाडा मालकांना बैल मालकाच्या बैलावरील असलेल्या प्रेमाचे अतूट नाते पाहून अश्रू अनावर झाले.

बैलगाडा शर्यतीवर आलेल्या बंदीनंतर कबीऱ्या यासारखे असे अनेक बैल विविध आजारांनी ग्रासले असून शेवटची घटका मोजत आहेत. परंतु, अशा दुधारी संकटावर मात करत शेतकरी बैलाचा औषध उपचार करत आहेत.

कबीऱ्याच्या दुर्देवी मृत्यूनंतर तालुक्यातील सर्व बैलगाडा मालकांनी एकत्रित येत बैलगाड्या वरील बंदी उठवण्याच्या हालचालीत पुन्हा सुरू केल्या आहेत. शेतकर्‍यांचे मायबाप म्हणवणार्‍या सरकारने येणाऱ्या काळात बैलगाड्या वरील बंदी उठवावी अशी कळकळीची मागणी गाडामालक तसेच शेतकरी करू लागले आहेत.