जास्त गोड खाल्ल्याने मधुमेह होतो? काय आहे तज्ज्ञांचं म्हणणं वाचा

गोड पदार्थ आवडीनं आणि ताव मारून खाणाऱ्यांना अनेक जण मधुमेह होईल म्हणून सावध करतात. तर बहुतेक लोक मधुमेह होईल या भीतीनं चहामध्येदेखील कमी साखर घालतात.

रक्तातील साखरेचं प्रमाण वाढल्यानं मधुमेह होतो, त्यामुळे सर्वांना असं वाटतं की जास्त साखर किंवा गोड पदार्थ खाल्ल्याने मधुमेह होतो.

गोड जास्त खाल्ल्याने मधुमेह होतो हा एक मोठा गैरसमज आहे, असं तज्ज्ञांनी सांगितलं.

मधुमेह हा इन्सुलिनच्या कमतरततेमुळे होणारा चयापचय संस्थेतील बिघाड आहे.

तज्ज्ञांच्या मते, गोड पदार्थ किंवा साखर थेट मधुमेहाला कारणीभूत ठरत नाही, तर त्यामुळे उद्भवणाऱ्या इतर समस्या मधुमेह होण्यास कारणीभूत ठरतात.

मधुमेहतज्ज्ञ डॉ. प्रदीप गाडगे म्हणाले, गोड पदार्थ खाल्ल्याने मधुमेह होतो असं नाही. गोड खाल्ल्याने कॅलरीजचं सेवन वाढतं, शरीरात कॅलरीज जास्त झाल्यास लठ्ठपणा बळावतो आणि लठ्ठपणामुळे मधुमेह होतो. त्यामुळे गोड पदार्थ हे अप्रत्यक्षरित्या मधुमेहाला कारणीभूत ठरतात.

मात्र मधुमेह झालेला असल्यास रक्तातील साखरेची पातळी नियंत्रणात राहण्यासाठी गोड पदार्थांवर नियंत्रण ठेवायला हवं, असा सल्लाही डॉ. गाडगे यांनी दिला आहे.