स्वॅबची नाही गरज फक्त गुळण्यांनी होऊ शकतं कोरोनाचं निदान; ICMR चा दावा

सध्या कोरोनाचं निदान करण्यासाठी नसल स्वॅब आणि थ्रोट स्वॅब घेतले जातात. मात्र आता इंडियन काऊन्सिल ऑफ मेडिकल रिसर्चनेने (ICMR) याला आणखी एक पर्याय शोधून काढला आहे ते म्हणजे गुळण्या.

फक्त गुळण्या केलेल्या पाण्यानेही कोरोनाचं निदान करणं शक्य आहे. स्वॅब नमुन्यांपेक्षा गार्गल वॉटरचे नमुने जास्त परिणामकारक आणि सोयीस्कर असल्याचं आयसीएमआरने म्हटलं आहे.  इंडियन जर्नल ऑफ मेडिकल रिसर्चमध्ये हा अभ्यास प्रसिद्ध करण्यात आला आहे.

आयसीएमआरने नवी दिल्लीच्या एम्स रुग्णालयातील 50 कोरोना रुग्णांचा अभ्यास केला. या रुग्णांना व्हायरसचं निदान झाल्यानंतर  72 तासांत त्यांचे स्वॅब सॅम्पल आणि गार्गल सॅम्पल घेण्यात आले.  त्यानंतर या नमुन्यांची आरटी-पीसीआर टेस्ट करण्यात आली आणि दोन्ही सॅम्पलचं मूल्यांकन करण्यात आलं.

स्वॅब नमुन्यांच्या तुलनेत गार्गल सॅम्पलचा परिणाम सकारात्मक दिसून आला. सर्वच्या सर्व नमुने कोरोना पॉझिटिव्ह असल्याचं निदान झालं. यामध्ये लक्षणं किंवा आजाराच्या अवधीचाही फरक पडला नाही. स्वॅब नमुने घेताना अशा अडचणी येतात.

तसंच रुग्णांचा विचार करता स्वॅब सॅम्पल घेताना सर्वाधिक म्हणजे 72% रुग्णांना समस्या जाणवत होती. मात्र गार्गल सॅम्पल घेताना फक्त 24% रुग्णांचा समस्या जाणवली तीदेखील सौम्य होती.

आयसीएमआरने सांगितलं, गार्गल सॅम्पल महत्त्वपूर्ण ठरेल. कारण गुळण्या करणं ही सोपी अशी प्रक्रिया आहे, यासाठी प्रशिक्षणाचीही गरज नाही. कुणालाही स्वत:हून नमुने देता येईल. आरोग्य कर्मचाऱ्यांनादेखील हे सोयीस्कर ठरेल कारण त्यांना नमुने घेताना कोरोनाचा धोका राहणार नाही.

शिवाय स्वॅबचा खर्च आणि नमुने घेणाऱ्या आरोग्य कर्मचाऱ्यांना घेताना लागणाऱ्या पीपीई सूटचा खर्चही वाचेल. जर्मनीतदेखील आरोग्य कर्मचाऱ्यांचे अशाच पद्धतीने नमने घेण्यात आले. त्यांनी 924  आरोग्य कर्मचाऱ्यांनी अशा पद्धतीने नमुने घेतले आणि यामुळे 225  पीपीई सूट आणि 1,000 स्वॅबची बचत झाली.