आश्चर्य! कच्छच्या रणरणत्या उन्हात शिमलाचे लालबुंद सफरचंद

सफरचंद म्हटलं की सर्वात आधी समोर येतं ते थंड हवेचं ठिकाण. हिमाचल प्रदेश, काश्मीर, शिमला अशा ठिकाणची सफरचंद.

सामान्यपणे थंड प्रदेशातच सफरचंदाची लागवड केली जाते. या ठिकाणच्या सफरचंदांचा रंग आकर्षक असतोच शिवाय ते चवीलाही गोड असतात.

थंड प्रदेशात लागवड होणारे सफरचंद उष्ण प्रदेशात घ्यायचं म्हटलं तर ते कसं काय शक्य आहे असंच आधी प्रत्येकाला वाटेल.

मात्र तुम्हाला ऐकायला आश्चर्य वाटेल, आता फोटोमध्ये तुम्ही जे लालबुंद असे सफरचंद पाहात आहात ते हुडहुडी भरवणाऱ्या थंड प्रदेशातील नव्हे तर अगदी रणरणतं ऊन असलेल्या प्रदेशातील आहेत

गुजरातच्या कच्छमध्ये या सफरचंदांची लागवड करण्यात आली आहे. जिथं तापमान चाळीशी पार असतं.

इतक्या थंड प्रदेशात तग धरणारे सफरचंद रणरणतं ऊन असलेल्या कच्छसारख्या प्रदेशातही तग धरू शकतात, असा प्रश्न तुम्हाला पडला असेल.

आपल्याला कठीण वाटणारी ही गोष्ट प्रत्यक्षात केली ती कच्छमधील प्रयोगशील शेतकरी शांतीलाल मावानी यांनी. शांतीलाल यांनी कच्छसारख्या उष्ण प्रदेशातही काश्मीरसारखे लालबुंद सफरचंद पिकवून दाखवले आहेत.

शांतीलाल यांनी हिमाचल प्रदेशच्या शिमलाहून सफरचंदाची रोपे आणली आणि त्याची लागवड गुजरातमध्ये केली. एका रोपाची किंमत 280 रुपये आहे.

गुजरातच्या कच्छमधील आपल्या खिरसारा गावात शांतीलाल यांनी सफरचंदांची लागवड करायला सुरुवात केली.

थंड वातावरणातील फळ उष्ण वातावरणात घ्यायचं म्हटल्यावर आवश्यक ती काळजी घ्यायलाच हवी, ती पूर्ण काळजी शांतीलाल यांनी घेतली.

सफरचंदांच्या रोपांना जास्त ऊन लागू नये म्हणून त्यांनी हिरव्या जाळ्यांचे शेड उभारले. तसंच आवश्यक तशा पाण्याचीही सोय केली.

शांतीलाल यांनी आणलेलं हे छोटंसं रोपटं आता दहा फूट उंच झालं आहे. या सफरचंदाच्या झाडाचं वैशिष्ट्य म्हणजे दोन वर्षांनी त्याला फळं येतात.

एका झाडाला 35 ते 36 सफरचंद आलेत. पुढील वर्षांपासून आणखी जास्त फळं येतील, असं शांतीलाल यांनी सांगितलं.

आता जी सफरचंदाने भरलेली ही झाडं दिसत आहेत ही शांतीलाल यांच्या मेहनतीचं फळ आहे.

गेल्या पाच वर्षांपासून शांतीलाल काश्मीरसारखे सफरचंद आपल्या कच्छमध्ये उत्पादित करण्याचा प्रयत्न करत होते. त्यांच्या या प्रयत्नांना अखेर यश मिळालं आहे.