लॉकडाऊनने वाढवली चिंता; कोरोनापासून वाचवलं मात्र 43% लोकांना गंभीर आजाराने ग्रासलं

दरम्यान, आतापर्यंत जगभरात कोरोनाच्या 97.7 लाख प्रकरणं समोर आली आहेत. तर जगभरात कोरोना विषाणूमुळे 4.9 लाख लोकांचा मृत्यू झाला आहे.

लॉकडाऊनमध्ये मानसिक आरोग्याच्या समस्या वाढल्या आहेत. 43 टक्के भारतीय डिप्रेशनचे शिकार झाले आहेत, असं नुकत्याच झालेल्या एका सर्वेक्षणात दिसून आलं आहे. जीओक्युआयआयने जवळपास 10 हजार भारतीयांचं सर्वेक्षण केलं. त्यातून ही धक्कादायक माहिती समोर आल्याचं वृत्त पीटीआयने दिलं आहे. 

सर्वेक्षणात लोकांचा दिनक्रम, भूक, झोप, लक्ष केंद्रीत करण्याची क्षमता, काम करण्याची ऊर्जा या सर्व बाबी तपासण्यात आल्या. 

59% भारतीयांना काम करताना कमी उत्साह वाटतो आहे किंवा उत्साह अजिबातच वाटत नाही.  57% लोकांनी त्यांना थकवा जाणवत असल्याचं आणि कमी ऊर्जा असल्याचं सांगितलं. काहींनी आपलं कोणत्याच कामात मन लागत नाही, खूप झोप लागते असं सांगितलं.

लॉकडाऊन, त्यामुळे जीवनशैलीत अचानक झालेला बदल, बेरोजगारी, आरोग्याची  चिंता, अनिश्चित वातावरण हे या मानसिक समस्यांसाठी कारणीभूत असल्याचं अभ्यासकांनी म्हटलं आहे.

जीओक्युआयआयचे संस्थापक आणि मुख्य कार्यकारी अधिकारी विशाल गोंदल यांनी सांगितलं, कोरोना महासाथीमुळे लागू करण्यात आलेल्या लॉकडाऊनमुळे देशभरात मानसिक आरोग्याच्या समस्या असलेल्यांची संख्या वाढते आहे. वाढत्या अनिश्चित अशा परिस्थितीमुळे निर्माण झालेला हा तणाव आहे. संतुलित आहार, दिनक्रमामध्ये बदल, ुपरेशी झोप, व्यायाम करून यावर नियंत्रण मिळवता येऊ शकतं.