PHOTOS : छत्तीसगढ मध्ये मतांचा बाजार? 10 रूपयांना किलोभर चिकन!

निवडणुक म्हटलं की मतं मिळवण्यासाठी वाट्टेल ती अमिषं दाखवली जातात. छत्तीसगढ मधल्या दुसऱ्या टप्प्याचा प्रचार आज संपला. इथल्या कोरबा इथं आचार संहिता भंगाचं 'आदर्श' उदाहरण पुढं आलंय. मतदानाला दोन दिवस राहिले असताना काही चिकन सेंटर्सवर 10 रूपयात एक किलो मटन दिलं जात असल्याचं निवडणूक आयोगाच्या अधिकाऱ्यांना आढळून आलंय.

काही चिकन सेंटर्सवर मतदारांना अमिष दाखवण्यासाठी 10 रूपयांमध्ये किलोभर चिकन देत असल्याची माहिती निवडणूक आयोगाला मिळाली होती. आयोगाच्या भरारी पथकानं अशा काही दुकानांवर छापे घालून कारवाई केली.

आयोगाचं भरारी पथक जेव्हा अशा दुकानांवर कारवाई करण्यासाठी आलं तेव्हा त्यांना दुकानांसमोर लांबच लांब रांगा आढळून आल्या. त्यांनी जेव्हा चौकशी केली तेव्हा त्यांना त्यात गौडबंगाल असल्याचं आढळून आलं.

भरारी पथकानं चिकन घेण्यासाठी आलेल्या ग्राहकांचा आणि दुकानदारांचा जबाब नोंदवून घेतलाय आणि असे प्रकार न करण्याची तंबी दिली. त्यानंतर दुकानांसमोरच्या रांगा एकदम कमी झाल्या.

छत्तीसगडमध्ये दुसऱ्या आणि शेवटच्या टप्प्यातला प्रचार रविवारी संपला. 20 नोव्हेंबरला इथं मतदान होणार आहे. उघडपणे प्रचार संपला मात्र मतांसाठी अमिषं दाखवण्याचे प्रकार आता जोरात असल्याचं बोललं जातंय. तर निवडणुक आयोगाची भरारी पथक लक्ष ठेवून असली तरी त्यांना चकवा देत काही टोळ्या मतांचं दान मागत फिरत असतात.