रशियापाठोपाठ आणखी एक देश कोरोना लशीसाठी तयार; कधी येणार बाजारात वाचा

रशियाने जगातील पहिली कोरोना लस तयार करून लवकरच बाजारात उलब्ध करून देण्याचा दावा केला आहे. आता रशियानंतर चीनदेखील आपली कोरोना लस डिसेंबरपर्यंत बाजारात येईल अशी आशा व्यक्त केली.

बीबीसीच्या रिपोर्टनुसार चीनच्या सिनोफार्म कंपनीने या वर्षाअखेरपर्यंत कोरोनाव्हायरसची लस तयार करणार असा दावा केला आहे.

सिनोफार्मचे चेअरमन लिऊ जिंगझेन यांनी प्रसारमाध्यमांशी बोलताना सांगितलं, या लशीचं तिसऱ्या टप्प्यातील ट्रायल यूएईमध्ये होत आहे आणि डिसेंबरपर्यंत ही लस बाजारात येण्याची आशा आहे.

लिऊ जिंगझेन यांनी ट्रायलवेळी आपणही डोस घेतल्याचं सांगितलं आहे. ग्लोबल टाइम्सशी बोलताना त्यांनी आपल्याला लशीचा कोणताही दुष्परिणाम झाला नसल्याचं सांगितलं.

चीनच्या बीजिंग आणि वुहान शहरातील वर्कशॉपमध्ये अनुक्रमे 10.2 कोटी आणि 10 कोटी लशीचं उत्पादन होऊ शकतं. या लशीच्या दोन डोसची किंमत 000 युआन म्हणजे जवळपास 10700 रुपये असेल.

जगभरात सध्या जवळपास 200 कोरोना लशींचं ट्रायल सुरू आहे आणि 20 पेक्षा अधिक लशी ह्युनम ट्रायलच्या टप्प्यापर्यंत पोहोचण्याच्या तयारीत आहेत.