‘दबंग’गिरी भोवली, सलमान खानविरोधात तक्रार दाखल

बॉलिवूडचा दबंग सलमान खान आणि त्याच्या बॉडीगार्ड विरोधात मुंबईच्या डी.एन. नगर पोलीस ठाण्यात तक्रार दाखल करण्यात आली आहे.

बुधवारी संध्याकाळी सलमान खान आणि त्याचे काही बॉडीगार्ड डी.एन. नगर परिसरात सायकल चालवत होते. आता सलमान रस्त्यावर सायकल चालवणार म्हटल्यावर त्याला पाहायला गर्दी तर होणारच ना..

सलमान सायकल चालवतोय हे पाहून एका व्यक्तिने त्याचा पाठलाग करायला सुरुवात केली. ती व्यक्ती गाडीतून सलमानच्या सायकलचा पाठलाग करत होती.

सलमानच्या अख्या टीमचा पाठलाग करताना तो सलमानचा व्हिडीओही काढत होता.

पोलिसांनी दिलेल्या माहितीनुसार, जवळपास २० मिनिटं ती अज्ञात व्यक्ती सलमानचा पाठलाग करत होती. भाईजानच्या जेव्हा ही गोष्ट लक्षात आली त्याने आपला राग व्यक्त केला.

सलमान त्या गाडीजवळ गेला आणि त्याने त्या व्यक्तीचा मोबाइल हिसकावून घेतला. यावेळी त्या व्यक्तीची आणि सलमानच्या बॉडीगार्डमध्ये बाचाबाचीही झाली.

या भांडणानंतरच त्या व्यक्तीने डी.एन. नगर पोलीस ठाण्यात जाऊन सलमान आणि त्याच्या बॉडीगार्जविरुद्ध तक्रार दाखल केली.