प्रियंका गांधींचं वाराणसीत शक्तिप्रदर्शन, थेट दिलं मोदींना आव्हान

काँग्रेसच्या सरचिटणीस प्रियंका गांधी या बुधवारी वाराणसीमध्ये होत्या. वारणसी हा पंतप्रधान नरेंद्र मोदी यांचा मतदारसंघ असल्याने त्यांच्या या दौऱ्याकडे सगळ्यांचं लक्ष लागलं होतं. प्रियंका गांधी यांनी वाराणसीतल्या मंदिरांना भेटी दिल्या आणि रोड शोही केला.

वाराणसीमध्ये काँग्रेसच्या सरचिटणीस प्रियांका गांधींच्या रॅलीत काँग्रेस आणि भाजप कार्यकर्त्यांमध्ये राडा झाला. रॅली सुरू असताना भाजप आणि काँग्रेसचे कार्यकर्ते भिडले आणि जोरदार घोषणाबाजी सुरू केली. एकीकडून 'चौकीदार चोर है'च्या घोषणा दिल्या जात होत्या, तर भाजपचे कार्यकर्ते मोदी, मोदीच्या घोषणा देत होते. या गोंधळात एक कार्यकर्ता जखमी झाला.

या रोड शोच्या दरम्यान त्यांना उत्तम प्रतिसाद मिळाला. फक्त वाराणशीच नाही तर अनेक जिल्ह्यांमधून कार्यकर्ते या रोड शोसाठी वाराणसीत आले होते.

या आधी प्रियंका गांधी या नरेंद्र मोदी यांच्याविरुद्ध वाराणसीतून लढत देतील अशी शक्यता व्यक्त केली जात होती. मात्र नंतर काँग्रेसने प्रियंका या वाराणसीतून लढणार नाहीत असं जाहीर केलं. माजी आमदार अजय राय हे वाराणसीतून काँग्रेसचे उमेदवार आहेत.

या रोड शो मुळे काँग्रेस वाराणसीतली निवडणूक गांभार्याने घेत नाही हा समज दूर करण्याचा प्रयत्न केला असंही बोललं जातंय.