फक्त 12 टी-20 सामने खेळलेल्या KKRच्या 'या' मिस्ट्री गोलंदाजाला मिळाली टीम इंडियात जागा!

आयपीएलनंतर भारतीय संघ ऑस्ट्रेलिया दौरा करणार आहे. बीसीसीआयनं याआधी ऑस्ट्रेलिया दौऱ्यासाठी भारतीय संघाची घोषणा केली होती. दरम्यान, यावेळी आयपीएल खेळणाऱ्या अनेक युवा खेळाडूंना भारतीय संघात जागा देण्यात आली आहे.

कोलकाता नाइट रायडर्सकडून खेळणारा वरूण चक्रवर्तीची भारतीय संघात निवड झाली आहे. हैदराबादविरुद्ध वरूणनं 5 विकेट घेत जबरदस्त कामगिरी केली होती. त्यामुळे वरूणसाठी आता थेट भारतीय संघाचे दरवाजे उघडले आहेत.

आयपीएलमध्ये वरूणला मिस्ट्री गोलंदाज म्हणून ओळखले जाते. टीम इंडियात निवड होणं वरूणसाठी स्वप्नापेक्षा कमी नाही आहे.

29 वर्षीय खेळाडूनं 2018मध्ये गोलंदाजी करण्यास सुरुवात केली. वरूणनं आतापर्यंत केवळ 12 टी-20 सामने खेळले आहेत. यात केवळ 1 प्रथम श्रेणी सामना आहे. त्यामुळे भारतीय संघात निवड़ झालेल्या या युवा खेळाडूंकडे खूप अपेक्षा आहे.

दरम्यान, वरूणनं भारतीय संघात निवड झाल्यानंतर, हे एका स्वप्नासारखं आहे. माझं लक्ष्य संघासाठी सातत्यानं खेळत राहणं, चांगली कामगिरी करणं आहे. अपेक्षा आहे की भारतीय संघासाठी सुद्धा मी अशीच कामगिरी करेन.

ऑस्ट्रेलियाविरुद्ध दौऱ्यात भारत चार कसोटी, तीन एकदिवसीय आणि तीन टी-20 सामने खेळणार आहेत.या दौऱ्याची सुरुवात एकदिवसीय मालिकेपासून होईल. दरम्यान यंदा टी-20 सामन्यांसाठी कार्तिक त्यागी, कमलेश नागरकोटी या युवा गोलंदाजांना राखीव म्हणून घेण्यात आले आहे.