भारतीय रेल्वेनं घडवला इतिहास, सर्वात शक्तीशाली स्वदेशी इंजिनची यशस्वी चाचणी

मधेपुरा इथं तयार झालेल्या रेल्वे इंजिनची चाचणी पंडीत दीनदयाल उपाध्याय जंक्शनमध्ये झाली. इंजिनसह 118 मालगाडी डबे जोडून ट्रायल घेण्यात आली. जंक्शनमधून झारखंडमधल्या बरवाडीह इथंपर्यंतचं 276 किमी अंतर पार पाडलं.

12 हजार हॉर्स पॉवरचं इलेक्ट्रिक इंजिन असलेल्या मालगडीच्या डब्यांसह ही पहिलीच चाचणी होती. चाचणीनंतर भारतीय रेल्वेनं सांगितलं की हा अभिमानाचा क्षण होता. रेल्वेच्या माहितीनुसार इंजिन 120 किमी प्रतितास वेगाने धावू शकते.

जगात सर्वाधिक हॉर्स पॉवरचं इंजिन तयार करणाऱ्या देशांमध्ये भारताचा समावेश झाला आहे. या यादीत भारत सहाव्या स्थानावर आहे.

इंजिन तयार करण्यासाठी 19 हजार कोटींचा खर्च करण्यात आला. सुरुवातील 5 इंजिन फ्रान्समधून आणून अॅसेंबल करण्यात आले होते. त्यानंतर 2017 मध्ये याचे प्रोडक्शन सुरू झाले. याआधी 2019 मध्ये पहिल्या रेल्वे इंजिनची चाचणी झाली आहे.

मेक इन इंडिया अंतर्गत हा प्रोजेक्ट करण्यात आला. भारतात अशी इंजिन निर्मिती झाल्यानं मालगाड्यांचा वेग वाढणार आहे. यामुळे इतर गाड्यांच्या वाहतुकीसाठी कमी अडथळा येईल.