घरात सुरू होती लग्नाची तयारी; सीमेवरुन लेकाची बातमी आल्यानंतर आई-वडिलांचा शोक अनावर...

जवान लक्ष्मण जोधपुरमधील बिलाडा भागातील खेजडला गावातील राहणारे होते. जम्मू-कश्मीरनध्ये पाकिस्तानकडून राजौरी सेक्टरमध्ये केलेल्या शस्त्रसंधी उल्लंघनात झालेल्या गोळीबारीत लक्ष्मण जखमी झाले होते. त्यांना सैन्याच्या रुग्णालयात हलविण्यात आले होते. तेथे त्यांच्यावर उपचार सुरू होता. मात्र त्यांना वाचवता आलं नाही.

लक्ष्मण अवघे 21 वर्षांचे होते. बुधवारी ते देशासाठी शहीद झाले. लक्ष्मण शहीद झाल्याचं कळताच गावात शोककळा पसरली आहे.

शहीद लक्ष्मण यांचे वडील शेतकरी आहे. लक्ष्मणच्या घरात आई-वडील आणि एक लहान भाऊ व बहिण आहे. अख्ख्या कुटुंबात लक्ष्मणच्या लग्नाच्या वार्तामुळे आनंद पसरला होता. पुढल्या महिन्यात त्यांचं लग्न ठरल्याने त्याची तयारी सुरू होती. यासाठी तो सुट्टीवरदेखील येणार होता.

संरक्षण विभागाच्या प्रवक्त्यांनी सांगितलं की, पाक सैन्याने राजोरी जिल्ह्यातील सुंदरबनी सेक्टरमध्ये शस्त्रसंधीचं उल्लंघन केलं होतं. या गोळीबारात 21 वर्षीय लक्ष्मण गंभीर स्वरुपात जखमी झाला होता. या वर्षी नियंत्रण रेषेवर पाकद्वारा शस्त्रसंधीच उल्लंघन केल्याच्या घटनेत लक्ष्मण शहीद होणारे चौथे जवान आहेत.

लग्नाच्या पूर्वी लक्ष्मणच्या गावी पक्क घरं बनवण्याची तयारी सुरू होती. शहीदच्या नातेवाईकांनी दिलेल्या माहितीनुसार लक्ष्मणने एक दिवसापूर्वी फोन करुन घराच्या बांधकामाची माहिती घेतली होती.